Vawiin chawhma dar 10:00 khan Serchhip District Superintendent of Police Office Training Hall-ah Serchhip District chhunga police officer, Inspector leh a chung lam chin tan inthlan leh a kaihhnawiha police te tih tur leh mawhphurhna te zir hovin training an nei. He training programme hi district bawrhsap Pi Juhi Mukherjee IAS chuan hawngin mahni hna theuh te tha taka hlen chhuak thei tur chuan training tha neih hi a pawimawhna hle a ni a ti.

Pi Juhi chuan inthlanna thianghlim, fel leh fai nei thei tur chuan police-te an pawimawh em em a ni tiin, police awmnaah chuan vote thlak tur mipuite pawhin ngaihngam leh ralmuang takin vote an thlak thei a, thil dik lo leh tha lo awm theite vengtu an nih bakah harsatna a thlen palh pawha sawrkar kut ke ber an ni a, chuvangin police tha leh chak kan mamawh nei thei tur chuan training tha taka neih hi kan mamawh a ni a ti bawk.

He training-ah hian Additional DC leh Serchhip District Election Nodal Officer ni bawk, Pu Lalsangliana pawhin thu sawiin District Administration leh police te thawh hona a that phawt chuan inthlan buaipui hi a tluang a, a awlsam thin a ni tiin District Executive Force (Police) leh District Administration hi thu khat vuaa kan kal a ngai a ni a ti a, chutiang tur chuan kan DC leh SP te chhungkaw khata an awm chuan remchanna tha tak min siam a ni tiin Serchhip district chu a vanneih thu a sawi. Pu Sangtea chuan Serchhip District-in District Election Management Plan (DEMP) kan siam chu District dangte entawn tur (model plan) atan CEO lamin an pawm thu a sawi a, chhuanawm a tih rualin plan tha tak siam hi a tawpna ni lovin, ruahmanna kan neih ang taka kan mawhphurhna theuhte hlen chhuak thei turin election buaitu tur zawng zawngte a sawm bawk a ni.

He training, Serchhip SP Pu Romil Baaniya IPS kaihhruaiah hian Addl. SP Pu Lalbiaktluanga MPS leh amah Pu Romil Baaniya te hian zirtirna an pe a ni.