Nimin chawhnu dar 3:30 p.m. khan Laki khua leh Paletwa inkara Kawngpui laih tur Lungphum chu Chief Minister Pu Lal Thanhawla’n Laki khuaah a phum. Laki leh Paletwa Road in a paltlang tur tlangdunga awm Myanmar khaw 11 atangin mi 600 chuang Laki-ah lo kalin Laki khaw tawntirh-ah Myanmar Gate siamin ropui takin Chief Minister te nupa hi an lo hmuak a. Myanmar Gate atang hian CM te nupa chu Hlado chham chung zela zawnin, Laki khua mipui ten an lo hmuahna Centenary Square-ah an zawn thleng ta a ni.

He Lungphum phumna inkhawmah hian thu sawiin Chief Minister Chuan Mizoram hi zohnathlak te tan kan Jerusalem a ni a. India ramah leh khawvel hmun hrang hrangah awm darh mah ila, insuihkhawm duhna rilru hi a thi ngai lo a ni. Mizoram tih loh-ah chuan Zohnathlak ten mahnia ro kan inrel ve thei hmun hi a awm lo avangin, zohnathlak hmun hrang hranga awm ten Inpui berah min lo neih pawhin, Inpui nghaktu rilru pua kan puan in te lo zauhva, midangte tana malsawmna kan lo nih hi kan kristianna nen pawh a inhmeh hle a ni. Zohnathlakte hian khawiah pawh awm ila, kan awmna piangah khua leh tui rinawm leh tha, taima leh hlawhtling ni theuh tum i la, mi dangte tana hnawksak ni lo va malsawmna ni theuh kan tum chuan, kan chhehvela ringlo mi te hian Zohnathlakte biak Pathian Nung hmel hi an lo hmu ve thei ang, a ti.

Chief Minister chuan sawrkar hmalakna hrang hrang leh hma chhawpte sawiin, sawrkar flagship programme NLUP 4th phase pawh September thla chhunga sem tum a ni a, Chief Minister NLUP Special package pawh district thenkhatah sem a ni tawh a, district dangah pawh sem chhunzawm zel a ni ang, a ti a. Sawkar laipui atanga NLUP tur chhungkaw 15000 tan sum dilchhuah tawh niin, chhungkua 1,20,000 ni tawh lo vin NLUP hian Chhungkaw 1,35,000 a tuam tawh zawk dawn a ni, a ti bawk.

Pu S.Hiato, Miniter i/c PHE, Tourism, Industries etc pawhin thu sawiin, Champhai District, Lawngtlai District leh Mizoram hmundanga hmalakna tiam lovin, Saiha district atang ringawt pawhin Myanmar nena inkal pawhna tur kawngpui hi hmunthumah sial tawh niin, Laki leh Paletwa Road kan sial zawh hunah phei chuan Saiha District khaw thlang leh chhak atang te in Myanmar hi kan pawh zung zung thei tawh ang. Chu chuan Myanmara kan zohnathlak unaute nen pawh sumdawn tawnna tha zawk leh inkungkaihna leh inhriatthiamna tha zawk min neih tir ngei ka beisei a ni, a ti.

He lungphum phumna programme hi Pu T.Seido, President INC Tuipang Block in a kaihruaia, Chief Ministerleh Pu S.Hiato bakah Pu RT.Zachono,CEM MADC ten thusawiina hun an hmang a, Pu Hiphei, Chairman MADC in ‘Vote of thanks’ sawiin programme hi a khar a ni. He Laki-Paletwa Road lungphum phuma-ah hian

Chief Minister hi MADC-a Puipate zawng zawng, Saiha District-a Head of office-te, Tlawmngaih pawl hruaitute,Party hruaitute leh Chanchinthehdarhtute ten an tawiawm.

Chief Minister hi Burma ramchhung khaw 11 atanga lokal ten Sechal lian tak an pek bakah Laki Joint Village Council ten Darkhuang an pe bawk a ni.