Vawiin chawhma khan Education Minister Pu Lalsawta chuan Chanmari YMA Hall, Aizawlah Mizoram RMSA Employees Welfare Association (MIREWA) buatsaih, “One Day Training on Universalization of Secondary Education” a hmanpui.

Pu Lalsawta chuan Education Department-in zirna hmasawnna atana hmathlir a neihte chu anmahni kaihruaitu anih thu a sawi a. Hmachhawp ruhrel a fuh a, tinzawn mumal tak neih anih chuan a laklawha thiah ngai lovin tluang tak leh rah tha tak chhuahin a kal thei dawn a ni, a ti bawk. Khawvel huapa kan hnam min pholang theitu chu zirna anih thu sawiin, ram leh hnam tana mi hmantlak chherchhuah chu zirtirtute mawhphurhna pawimawh tak a ni, a ti. Zirtirtute chu an hnaa an inpekna leh taimaknate chhawm nung zel turin a fuih a, “Sorkarin a hlamchhiah ngai lovang che u”, a ti bawk.

Khualzahawm State Project Director, RMSA, Pu P. Lalchhuanga, IAS chuan zirtirtute chu ramin zirna tha leh huapzo a neih nana hmun kilkhawr tak tak pawha an thawh thin avangin chhuanawm a tih thu sawiin, an mawhphurhna pawimawh takte hlenchhuak zel turin a chah bawk.

He hun hi Pu R. Lalchhuanmawia, MIREWA President chuan kaihhruaiin, Pu Kawngkharmawia Hauhnar, General Secretary hnen atangin report ngaihthlak a ni bawk. Chawhnu lam hi Pu Lalrohlua, Vice President, MIREWA chuan kaihruaiin, Dr. Lallianzuali, Associate Professor, IASE chuan training a pe a, Pu J.Lallawmtluanga, Asst. General Secretary, MIREWA chuan lawmthu sawiin hun a khar a ni.

RMSA hi Mizorama district zawng zawngah kalpui mek a ni a, Zirtirtu 532 awmin, Clerk 81 leh Laboratory Attendant 280 nen, an vaiin thawktu 893 an awm mek a ni.