Vawiin hian Serchhip DC Meeting Hall ah District Level Committee on Fire Prevention te chu an chairman Dr. Lalzirmawia Chhangte, IAS hovin an thukhawm a, Fire Prevention Week, 2020 hawnna neiin kangmei laka ram venhim dan tur ruahmanna hrang hrang te an rel nghal.

Fire Prevention Week hawnna thutawi a sawiah Chairman Dr. Lalzirmawia Chhangte chuan, kangmei hlauhawm zia leh ramin a tawrh nasat theih zia hrechiangtute vek kan ni a, chutihlaiin kan rama mipui tam zawk ten loneia ei kan la zawn avangin ram tihkan palh theihna remchang a tam em em bawk si a. Mitin kan fimkhura ram tikang lo tura tan kan lak a tul hle a ni, a ti a. Sawrkar pawhin ram kang hi a duhlo em em a, State level te, District level Committee te dinin Village Level thlenga din turin hma a la mek a ni, a ti a. Mipuite chu kangmei laka kan ram a him theih nana tlawmngaih chhuah tur leh uar lutuk awm lova inzirtir turin a ngen a ni.

Kumina Fire Prevention Week thupui hi “Kangmei chhuak tur veng la, i ram chhan rawh” tih a ni.

Dr. Lalzirmawia Chhangte kaihhruaiin District Level Committee te hian Fire Prevention Week chhunga hmalak dan tur te, kumin thal chhunga ram kang tur venga hmalak dan tur te, mipui zirtirna kalpui dan tur te, ram tikangtute laka hremna na zawk lek dan tur leh district intihsiaknaa lawmman an lak ngei theih dan tur te, Village Level-a kangmei ven kawnga tithate lawmman pek dan tur te leh thil pawimawh dang te an rel nghal a ni.

Meeting ah hian Pi Margaret Lalramchhani, Member Secretary, DFO Thenzawl chuan Mizoram leh Serchhip district in ramngaw a neih dan din hmun te, ram kang vanga mihringin kan tawrh dan te, Fire Prevention Week chhunga kum hmasa lama hmalak dan te report ngaihthlak a ni bawk.