Vawiin World Pulses Day, 2020 pual hian Serchhip Agriculture Department Conference Hall ah hun hman a ni.

He huna Resource Person Pu K. Laltlanmawia, Subject Matter Specialist, Serchhip chuan, Food & Agriculture Organization (FAO) ten Kum 2016 kha International Year of Pulses kum atan an lo puan tawh thu sawiin, kum 2018 a UN Session vawi 73-na in kum tin World Pulses Day hman thin tawh tura a lo rel angin kumin 2020-ah World Pulses Day vawi 2-na hi hman anih thu a sawi a. Kan rama Pulses (Be kawm nei) kan neih langsar zualte zingah Dal, Chana, Kel ek Chana, Bekang leh Bete te anni a, heng bekawm nei chite hi hriselna atana ei tam a that thu a sawi a. Serchhip District chhungah Pulses chinna hmun ram 170 hac a zau chiah ala awm thu sawiin, Pulses (Be kawm nei) te hi ching uar turin loneitute a chah a, India ram chu khawvela Pulses thar tam ber ram (28%) ni mah ila ram chhung mipute khamkhawp kan la thar chhuak lova, kan la intodelh lo hle a, kum tin a man pawh a sang chho zel a ni, tiin Pulse lam chin uar deuh deuh a tul thu a sawi a ni.

He hun hi Pu T. Ngurkhuma, Agriculture Extension Officer, Serchhip chuan a kaihhruai a, Martin Zohmingliana, Agriculture Extension Officer, Serchhip District in lawmthu sawina hun a hmang a ni.

Pulse day hi Serchhip District Agriculture Department, DMU-FOCUS leh ATMA hnuaia thawktuten an hmang a ni.