Vawiin khan Chapchar Kut Celebration Committee, Champhai District chu DC Conference Hall-ah thukhawmin March Ni 6, 2020 a Chapchar Kut hman dan tur an rel.

He thutkhawm hi Bawrhsap Pu Mark Lalthanliana chuan kaihruaiin Chapchar Kut chu Mizo-te tana ni pawimawh tak anih avangin huapzo leh hriathlawh taka hman nise tha a tih thu a sawi a. Meeting tura kalkhawmte chungah lawmthu sawiin, inpawhtlang taka ngaihdan leh tawn hriatte sawi tlanga thil tha ber ngaihtuah chhuah anih a beisei thu a sawi bawk.

Meeting chuan Chapchar Kut chu Mizo hnam ziarang tarlanna leh chawisanna hun tha tak anih avangin kuminah pawh urhsun taka hman leh nise a ti a. Mizo hnam ziarang tilang thei tur leh intihhlimna lamte pawh a tam thei ang ber neih nise ti a rel a ni a. Nikum lama Chapchar Kut kutkentu ber Sub Hqrs YMA aiawhin Secretary Pu PC Lalrawnliana hnen atangin programme neih dan leh senso tlangpuite ngaihthlak a ni a. Meeting chuan Chapchar Kut chu District Sports Complex, New Champhaiah hman nise a ti a, Kut Pa leh Kut thlengtu ruat mai bakah programme kimchang leh hmalak dan turte buaipui turin Working Committee a din nghal a, kumina State sawrkar sum rawn pek tur cheng nuai 3 baka senso ngai tur dangte atan sawrkar department leh mi inphalte hnen atangin tanpuina sum khawn nise tiin, hemi lo buaipui tur hian Fund Raising Committee pawh din a ni. Heng bakah hian line department hrang hrangte mawhphurhna leh tul dangte sawiho a ni bawk.