Khawzawl District Level Fire Prevention Committee buatsaihin Electric veng YMA Hall-ah Kangmei ven hapta (Fire Prevention Week), 'Kangmei veng la, i ram chhan rawh' tih thupuia neih chu Khawzawl DC Pu H. Lianzela chuan a hawng.

He hun Khawzawl Joint VC Chairman Pu Zoremsanga kaihhruaiah hian Khuallian chuan ram kang chungchanga dan kan neihte hriat thar leh a tul thu sawiin, khawtlang hruaitu Village Council leh mipuite chu tha taka dan zawm turin a ngen a. Lo leh leipui vat te chu ram hal hun bituk chhung ngeia hal tur leh vah bak ram ti kang lo tura fimkhur tura chahin, a tikang luite chu dan anga hrem an nih dawn thu a sawi a. Tlawmngai pawl, chanchinbumite leh khawtlang hruaitute chu kangmei tichhuak lo tura mi dangte hrilhhriat kawngah tan la tur leh kang veng tha lawmman dawng thei tura tan la turin a ngen a. Bawrhsap chuan sorkar Pisa hrang hrangte chu kang thelhna hmanrua fire extinguisher kawl theuh tura chahin, mimal In leh dawr neitute pawh a theih hram chuan fire extinguisher nei vek turin a ngen bawk. Pu H.Lianzela chuan mi dangte tawrh tura kan ngaih hi a tuartu kan ni thei tih hria a kang mei lakah fimkhur turin kalkhawmte a chah nawn leh a. Khawzawl District chhungah kangmei ven hapta mai bakah a hnu leh thlenga kangmei ven beihpui hlawhtling taka kalpui anih theihna turin a hawng a ni.

He hunah hian Khawzawl District Superintendent of Police Pu PC Lalchunglura, MPS chuan kangmei ven kawnga hriat tur pawimawh tak takte powerpoint presentation hmangin a tarlang a. DFO (Wildlife) Pu PC Lalchhandama pawhin District Level Fire Prevention Committee-in kangmei ven kawnga ruahmanna an siam dan te, kang mei ven kawnga thil tul leh pawimawh tak takte a sawi a. Addl DC Paul L. Khuma'n lawmthu sawina neiin hun a khar a ni.