Vawiin chawhma khan Parish Hall, Venglai, Kolasibah District Level Fire Prevention Committee hmalakna in Fire Prevention Week hawnna hun neih a ni a. ‘Kangmei chhuak tur veng la, i ram chhan rawh’ tih thupui a hman niin Pi sangchhin Chinzah, Deputy Commissioner, Kolasib district chuan hawnna hun a hmang a ni.

Pi Sangchhin Chinzah chuan Kolasib district chhung a tun hnai a Vairengte leh Meidum khuaa inkanna thleng chu pawi a tih thu sawiin chhiattawhna hi tu chungah pawh thleng thei a nih avangin mi tin fimkhur thar lehzual turin a ngen a. Kangmei chhuak ven chu Sawrkar department bil emaw, tlawmngai pawl te thawh tur bik a nih loh thu a sawi a, mei chelek kawng ah kan fimkhur tlan theuh a, midangte pawh fimkhur tur a kan inhrilhhriat zel hi mi tin mawhphurna a nih thu a sawi bawk a ni.

Vawiin hun kaihruaitu Pu C Liankunga, President, Sub-Hrq YMA Kolasib chuan thangthar lo la awm zel tur te dem kan hlawh loh nan ram leilung hausakna venhim leh humhalh chu kan kova a tlak lai hian tha thla lova thahnemngai tak a thawk turin kalkhawm te a chah a, kangmei venna kawnga Mizoram chhung a district titha ber ni tur a thawk theuh turin a chah bawk a ni.

Pu C Lalrinmuana, ACF in ‘Kangmei ven a tul nachhan’ tih thupui hmangin Powerpoint presentation a pe a, 2015 khan tum 118, 2016 ah tum 298, 2017 ah tum 32, 2018 ah tum 20 leh 2019 khan tum 12 ram kang a awm thu a tarlang. Pu Joseph P Liana, ACF in District Fire Prevention Committee hmalakna tlangpui tarlanna hun hmangin Pu Andrew VL Auva, Vice President, MJA Kolasib hnen atangin Fire Prevention Week thuchah ngaihthlak a ni bawk. Fire Prevention Week chhung a Kolasib District chanchinbu chhuak te zing a ‘Fire Prevention Awareness’ nei tha ber tan lawmman siam a nih tur thu tarlan a ni bawk.