Tukin khan Serchhip Bazar ah Freedom from Open Defecation Week hawnna buatsaih a ni a. Pawnlera inthiar awmlohna District kan nih theih nana Department hmalak dan leh faina leh thianghlimna pawimawhna inzirtirna hun atana hman a ni.

He huna khuallian, Pi Sangchhin Chinzah, Serchhip Bawrhsap ni bawk chuan, faina leh thianghlimna chu kan nun pumpuia kan zenghet atana thil tul, keini leh kan thlahte thlenga a tha zawnga nghawng tam tak nei thei thil a ni, a ti a. Week chu nasa zawka kan inhrilhhriatna, a taka nunpui erawh chu engtiklaipawha kan tih reng tur thil a ni, a ti. Serchhip District chhung thingtlang lam (Gramin) te ODF a ni fel thei tawh chu lawmawm a tih thu leh, hetiang dinhmun thleng thei tura thawktute beihna fakawm a tih thu sawiin, reiloteah ODF District kan ni thuai dawn a ni, a ti.

Pu R. Sanghmingthang, President, Sub- Headquarters YMA pawhin thusawiin, Serchhip District chu ram lailia awm, kan unauten an paltlang tam leh an hriatchian a ni a. Hei vang hian fai tak, thianghlim taka mahni leh chhehvel vawn hi kan tih makmawh a ni. Midangte entawn tlaka kan nun a tul a ni, a ti bawk.

He inkhawm hi Pu F. Lalsanglura, Sr E.E, PHE Serchhip Division chuan a kaihruaia, Swachh Bharat (Gramin) hmanga Department hmalak dan hrang hrangte tarlangin, thingtlang lam chu ODF a puan fel a nih tawh thu a sawi a. Mizoram pumpui chu kumin October ni 2 hmaa ODF State a puan hman tuma hmalak mek a nih thu leh Swachh Bharat hnuaia hmalakna dangte, tui thianghlim kan hnianghnar theih nana Department hmalak mekna thenkhat te a sawi lang a ni.

Freedom from Open Defacation hi sawrkar laipui ruahmanna hman niin Dt 9-16^th August, 2017 inkara hman tura duan a ni a. Ram chhung hmun hrang hrangah hman chhoh mek a ni.

Tukina he hun hmannaah hian Branch hrang hrang YMA  member thahnem tak leh sawrkar hnathawkte, tlawmngai pawl leh chanchinbumite, khawtlang hruaitu leh zirlai naupang engemaw zat an tel a ni.