“Entrepreneurship” chungchang inzirtirna leh sumdawnna leh eizawnna kawnga ngaihtuahna thar tha tak tak nei te inelna tur, Mizoram Kailawn B-Plan Contest chungchang inhrilhhriatna vawiin khan Aizawl West College Hall-ah neih a ni. He “Mizoram Kailawn B-Plan Outreach Programme” hi New Economic Development Policy (NEDP) hnuaia hmalakna niin, Mizoram State Entrepreneurship Development Monitoring Committee (MEDMOC) hnuaia Master Trainer-te leh IIM-Calcutta Innovation Park atanga mithiam lo kal ten zirtirna an pe a. He hunah hian Govt. Aizawl West College, Govt. T. Romana College leh Govt. Johnson College zirlai te an tel a ni.
Mizoram Kailawn Outreach Programme-ah hian B-Plan Contest-a tel dan inhrilhhriat a nih bakah zirlaite chu sorkar hna ringawt beisei lova, mahni thiamna leh theihna a innghata eizawnna ngelnghet leh hlawkthlak a neih theih thu te zirtir niin, chumi atan chuan NEDP hnuaia Entrepreneurship Development Scheme (EDS) chu “plan” leh “idea” tha nei te pui tura duan a nih thu sawi a ni. B-Plan Contest-ah hian thalai mahni kutkawiha eizawnna kawng zawh duh te tan tel theih vek a ni a. Entrepreneurs – sumdawnna leh eizawnna thil a hlawhtling tura ‘risk’ la chunga hma la ngam te chuan ngaihtuahna thar (idea) nena thilthar an hmuhchhuah emaw, thil tih dan thar an ngaihtuah chhuah emaw, kalphung sawi danglam a hlawk zawk leh awmze nei zawka hmalak dan emaw an neih te hmangin he contest-ah hian tel thei a.
He contest-a tel duh te chuan www.mizoramkailawn.org ah emaw www.mizoramkailawn.com ah in register in, dilna hi August ni 31, 2017 thleng hian thehluh theih a ni a. September ni 25-ah finalist 40 te hming tarlan tura ruahmanna siam niin, heng finalist-te hian 4th-10th October thla chhunga training an neih hnu ah 10th October, 2017-ah Entrepreneurship Summit-ah Final Round an hmachhawn leh ang a, hemi hunah hian Result puanna neih a ni ang. Finalist-te training hi MEDMOC-in partner atan a neih, Indian Institute of Management, Calcutta (IIM-C) Innovation Park mithiamten an zirtir dawn a ni.
Vawiina Outreach Programme hi Pu Lalrinnunga Jahau, EDS Project Coordinator chuan kaihruaiin, Dr. Vanlalthana, Master Trainer chuan NEDP hnuaia Entrepreneurship Development Scheme (EDS) chungchang sawifiahna a nei a. IIM-Calcutta Innovation Park atangin Prof. Chandradeep Mitra, Project Director leh Pu Gaurav Kapoor, Project Manager te chuan ‘entrepreneur’ ni tura hma lak dan te, Mizoram behchhana entrepreneur hlawk tak nih theih dan tur kawngte zirlaite chu ngaihtuah puiin, zawhna leh chhanna hun te hman a ni.
