District Level Committee on Green Mizoram, Serchhip hmalakna in vawiin chawhma dar 10:00 khan Serchhip DC Conference Hall ah Green Mizoram Day 2013 pual a inkhawm a ni a, District Bawrhsap, District Level Committee on Green Mizoram, Serchhip Chairman ni bawk Pi Juhi Mukherjee, IAS chuan khuallian niin a hmanpui a, PCR High School zirlaite leh zirtirtute bakah tlawmngai pawl hrang hrang te, sawrkar hnathawk te an tel tha hle a, chawhnu lamah Serchhip khawpui leh a chhehvel hmun hrang hrangah thingphun hnatlang neih nghal a ni bawk.

Green Mizoram Day 2013 puala inkhawm ah hian khuallian District Bawrhsap chuan thusawiin mipui kalkhawmte chu chibai leh duhsakna a hlan a, Mizoram hi Tropical Evergreen Forest hnuaia awm anih avangin ramngaw te a tha duh em em a, mahse mihring khawsak phung changkang zelin heng ramngaw tha tak tak te hi a tih chereu mek zel avangin, ruahman na thar nen hun lo la kal tur thlir a, theihtawp chhuaha ramngaw chhe mek venhim chu kan tih tur makmawh a ni a ti a, Thingkung te hian kan mamawh chi hrang hrang Oxygen, chenna In, silhfen leh eitur chi hrang hrangte min hlui avangin kan zah thiamin kan duat thiam a pawimawh ani a ti bawk.

Serchhip District ah hian kum 1999 atang khan Green Mizoram Day hi hman tan a ni a, District Bawrhsap Chairman na hnuaiah District Level Committee on Green Mizoram, Serchhip din niin Divisional Forest Officer, Thenzawl chu Member- Secretary a ni. Vawiin inkhawmah hian kum 2012 Green Mizoram Day denchhen a thingphun Sawrkar Department hrang hrang zinga thing phun nung thate hnenah lawmman sem a ni a, District Bawhsap in lawmman te hi a hlan a ni. Heta lawmma dawng tu te chu : Pakhatna- Public Works Department ; Pahnihna – Marian High School, Serchhip ; Pathumna – Police Department leh 14 Assam Rifles.

Kum 2013 Green Mizoram Day thupui atan hian “Thing phun la, i ram chhan rawh (Plant Trees - Save Your Land)” tih chu hman a ni a, hemi denchhen hian chawhnu lamah khawpui chhung leh pawn hmun hmun hrang hrang thlanchhuah bik ah te thingphun hnatlang neih ani a, District Bawrhsap hovin Sawrkar Department hrang hrang a thawk te, Sub-Headquarters YMA Serchhip leh School naupang ten thingphun hnatlang hi an nei a, heng thingphun tur tiak leh a hungna tur pal te hi Divisional Forest Officer, Thenzawl leh a thawhpui ten a thlawnin an sem a ni.