District Level Committee on Green Mizoram, Serchhip hmalakna in vawiin chawhma dar 11:00 khan Serchhip DC Conference Hall ah Green Mizoram Day 2012 pualin inkhawm a ni a, District Bawrhsap, DLC on GM Serchhip Chairman ni bawk Pu P.Lalchhuanga’n khuallian niin a hmanpui a, High School zirlaite leh zirtirtute bakah tlawmngai pawl hrang hrang te, sawrkar hnathawk te an tel tha hle a, chawhnu lamah Serchhip khawpui leh a chhehvel hmun hrang hrangah thingphun hnatlang neih nghal a ni bawk.

Green Mizoram Day 2012 puala inkhawm ah hian khuallian District Bawrhsap chuan thusawiin mipui kalkhawmte chu chibai leh duhsakna a hlan a, Serchhip District-in kum kalta chhunga Mizoram puma kangmei veng tha ber lawmman pahnihna a la chu lawmawm a tih rualin tan nasa lehzuala pet u nise a duh thu a tarlang a, mipuiten ramngaw humhalh a pawimawhzia sawiin mihringin kan mamawh em em Tui, Chaw tha leh Boruak thianghlim (oxygen) te min petu leh min khawlkhawm sak tu pawimawh be rte zing ami chu thing leh ramngaw te hi an ni a ti a, heng rohlu tak tak khuanu in min pek te hi kan dimdawi thiam tawk loh avang leh kan hlut thiam tawk loh avangin a rah kan seng tan ta mek a ni tiin, khua a tlai chhiat hma hian keimahni tan mai bakah kan tu leh fa te ngaihtuah reng chungin ramngaw humhalh kawngah tan i la thar leh ang u tiin mipuite a sawm a, he hnathawk tur hian naupang atanga tar thlengin tih theih kan nei vek a, mitinin kan tih tur kan tih vek chuan awlsam takin kan ram sik leh sa dinhmun chhe mek hi kan siam tha leh thei a ni a ti bawk. Thing phun ringawt mai duh tawk lova a enkawl puitlin pawh kan mawhphurhna theuh ani tih hre theuh tura mipuite chu chahin Bawrhsap chuan vawiin ni hi inzirtirna ni ah ngai ila, kumtluanin mahni remchan dan apiangin thingphun i tum ang u tiin mipuite a sawm a ni.

Serchhip District ah hian kum 1999 atang khan Green Mizoram Day hi hman tan a ni a, District Bawrhsap Chairman na hnuaiah District Level Committee on Green Mizoram, Serchhip din niin Divisional Forest Officer, Thenzawl chu Member- Secretary a ni a, he committee hmalakna hian tun thlengin Serchhip District chhungah thing tiak nuaih khat, sing riat leh sang khat (1.81 lakhs) phun a ni tawh a ni. Vawiin inkhawmah hian kum 2011 Green Mizoram Day denchhen a thingphun Sawrkar Department hrang hrang zinga thing phun nung that e hnenah lawmman sem a ni a, District Bawhsap in lawmman te hi a hlan a ni. Heta lawmma dawng tu te chu : Pakhatna- Police Department ;Pahnihna - School Education Department ; Pathumna - Deputy Commissioner’s Office leh Serchhip Government College.

Kum 2012 Green Mizoram Day thupui atan hian “Thingphunin Zoram Nuam I Siam Ang U” tih chu hman a ni a, hemi denchhen hian chawhnu lamah khawpui chhung leh pawn hmun hmun hrang hrang thlanchhuah bik ah te thingphun hnatlang neih ani a, District Bawrhsap Pu P.Lalchhuanga pawhin Dawngzawl rama Serchhip District Park ah “Bung” a phun a, Sawrkar Department hrang hrang a thawk te, Sub-Headquarters YMA Serchhip leh School naupang ten thingphun hnatlang hi neiin, heng thingphun tur tiak leh a hungna tur pal te hi Divisional Forest Officer, Thenzawl leh a thawhpui ten a thlawnin an sem a ni.