Kolasib-ah Green Mizoram Day 2012 vawiin khan phur taka hman a nita a, a hawnna inkhawm CZ Higher Secondary School, Kolasib-a neihah khuallian Addl. DC Pu Zairemmawia chuan, Kan ram, kan District ti hring nuam turin uar takin thing i phun ang u, a ti a ni.

Pu Zairemmawia chuan, Thing leh mau te hi kan nitin khawsaknaa boruak tha leh thianghlim min petu an ni a. Khawvelin thiamna chi hrang hrang leh changkanna avanga boruak bawlhhlawh pollution nasa lutuk a hip tak mawlh mawlh avang te, kan ram kan tih chereu nasat vanga thlaler ram kan hnaih tawh avang te, khawlum namen lo kan tawrh tak avang leh kan tuihna te a tlem tawh avangin keini leh kan tu leh kan fate hmakhua atan liau liau Thing leh mau hmanga kan ram kan tih hrin hi kan tih makmawh a nita a ni, a ti a. Hemi atan hian mitin kan tan tlan a ngai a. Tam tak phun a enkawl zui loh ai chuan kan enkawl zawh tawk phun ila. Chu chu hlawhtling ngei turin i chawm ang u, a ti a ni.

Pu Lalthlamuana Pachuau, DFO, Kolasib chuan inkhawm hi a kaihruai a. Green Mizoram Day puala thing phun turte chu Department in uluk taka a enkawlte a ni, a ti a. Green Mizoram Theme, Thing phun la, Zoram nuam i siam ang u, tih bawhzuiin kan ram chhunga tui hna kang chat mek leh boruak lum chhe lutuk tur ven nan te uar taka thing hi phun tura hma lak a ni, a ti a ni.

Nikum 2011 –a Green Mizoram Day puala sawrkar Department hrang hrangte thing phun chu endiktu tura ruat ten uluk takin an endik a. Green Mizoram Day hawnna inkhawmah hian a titha zual pathum te hnenah lawman hlan a ni a. Pakhatna chu EE, Serlui Thermal Project Division, Bilkhawthlir an ni a, Rs 2,000/- leh Citation an dawng a, 2-na Excise & Narcotic in Rs 1,500/- leh citation an dawng a. 3-na Health Sub Centre Thingdawl-in Rs 1,000/- leh citation an dawng bawk a ni. Pu P.C. Lalchhandama, ACF chuan report a pe a.

Pu C.Liankunga Sub. Hqrs. YMA chuan thingphun te an endik dan a sawi a. Pu Lalnghilhlova Chinzah, Principal, CZHSS chuan lawmthu sawina hun a hmang bawk.

Hawnna inkhawm neih zawh hian CZHSS kawt tualah khuallian Pu Zairemmawia leh Department hrang hrang hotuten thing an phun hlawm a. Hemi hnu hian Department hrang hrangte chu Rengtekawn to Zero Point inkara thing phun turin an fehchhuak hlawm a ni.