Vawiin chawhma dar 10:00 khan Champhai-a CHANEM tualah Green Mizoram Day, 2012 chu Pu T.T. Zothansanga, MLA Champhai North Constituency bialtu chu khuallian niin a hmanpui.

Green Mizoram Day hawnna inkhawm, DFO Pu C. Vanlalena, Member Secreary, District Level Green Mizoram Committee ni bawk kaihhruaiah hian khuallian chuan thusawiin khawvel huapin ngaihtuah la, khawtual ah hma la ve rawh tih sawiin khawvel lo lum zel 97 % hi mihringte avanga thleng a ni, a ti a. Mizoram bikah pawh kum 2004 aia 2005 - 2006 a a lumna chu 2.25 degress in a sang tawh zawk a ni, a ti a. Aizawl khawpui pawh tun atanga kum 50 ah chuan khawvel khawpui lum ber zingah a tel tawh dawn niin mithiam ten an chhut tih a sawi.

Pu T.T. Zothansanga chuan Ozone pawp hi a zau zel a, kum 2008 ah khan km maktaduai 2 in a zau tawh a, khawvel lum zel tur ven nan kan phak ang tawka ramngaw venhim leh humhalh hi kan zavaia kan vei tlan a hun ta a, thing kan phun a, kan enkawl puitlin chuan keimahni ngei hi a zar zotu tur kan ni dawn a, Champhai leh Mizoram hmun danga kan thingphun te kan tih puitling a, kan ram kan ti hring tha anih chuan khawvel chuap kan ni dawn a ni, a ti.

Thusawitu dang Pu C. Lalremliana, Chairman, Science & Environment, Sub Headquarters YMA, Champhai chuan nikum khan Department hrang hrangin thing tiak 1718 an phun a, dam khaw chhuak chu 672 chauh a ni. Hetianga kan thingphun te a nung a tlem nachhan chu kan enkawl zui tawk loh vang te, kawng kama huan siamtuten an dim tawk loh vang te, kang mei vangte anih thu a sawi a, meihawl rawh avanga kan ram thing a chereu nasa lutuk chu a vei thu a sawi bawk a. Thingphun tura kalkhawmte chu sawrkar programme anih avanga phun mai mai lo tura chahin kan dam chhunga khawvel tan thil tha pakhat tal tih kan duh anih chuan thing pakhat tal kan phunin kan enkawl puitling tur a ni, a ti bawk.

He programme ah hian nikum lama thingphun enkawl puitling tha te hnenah lawmpuina certificate hlan an ni a, pakhatna chu Mini Diet leh Govt. Ruantlang High School inkawp an ni a, anni hian an thingphun te a vaiin an ti nung vek a ni. Pahnihna chu Sub-Headquarters MHIP, Treasury, Revenue leh Soil Department inkawp te an ni.

Hawnna programme hman zawh hian thing phunna tura ruahman hrang hrang ah department hrang hrang leh zirlai rual ten thingphun tur an la chhuak a, khuallian Pu T.T. Zothansanga\'n thingphun tura kalchhuak te hi a vailiam a ni. Vawiin ah hian thing tiak 5000 phun tura ruahman a ni.