Vawiin chawhnu dar 1:00 khan District Level Committee on Green Mizoram, Serchhip chu Serchhip DC Meeting Hall-ah June ni 11, 2014 a Serchhip-a Green Mizoram Day hman dan tur ngaihtuahin an thu khawm.

Vawiin Green Mizoram Committee thutkhawm kaihruaitu Pu V.L.Remliana, MCS, Addl. D.C., chuan kuminah Serchhip in kangmei nasa tak a tawrh avangin mipuite leh nungchaten harsatna nasa tak an tawh phah a, a tikangtu chu mihringte bawk kan nih avang hian nasa lehzuala ramngaw humhalh te inzirtir a tul a ni tih sawiin kumina Green Mizoram Day hman tur pawh urhsun lehzuala hman tha a a hriat thu a sawi a ni.

Ruahman dan chuan ‘Green Mizoram Day 2014’ pual inkhawm hi June ni 11 (Nilaini), 2014 chawhma dar 10:00 ah Serchhip Bazar ah hman tur a ni a, Khuallian atan District Bawrhsap Pi Juhi Mukherjee, IAS beisei a ni. He inkhawmah hian Kangmei Ven kawnga hmala tha zual thlanchhuah khaw pathum hnenah te, Chanchinbu a Kangmei ven leh ramngaw humhalh lam hawizawng thuchhuah tha ber hnenah te leh Green Mizoram Day 2013 denchhena thingphun Agency hrang hrang –Sawrkar Department, School, Colleges leh NGO zinga thingphun nung tha leh humhalh tha berte hnenah lawmman sem ani dawn a ni.

Green Mizoram Day puala inkhawm tawi hman zawh anih veleh hian Sawrkar Department, School, Colleges leh NGO ten hmanni lawka Serchhip dai ram kan vakna hmun Sailiamkawn leh Dawngzawl inkar kawngsirah thingphun beihpui an thlak nghal dawn a ni. Hei bakah hian thingphun uar tura inzirtirna lam hawi banner siam a hmun hrang hranga tarchhuah ani bawk ang.

Hei bakah hian YMA Branch behchhana Fire Prevention Squad din thin chu chak zawka thuam anih theih dan tur te ngaihtuah a ni a, District Level Committee on Green Mizoram, Serchhip chuan kumina Serchhip dai ram tikangtute chu manchhuah an nih ngei a na thei ang berah hrem an nih an beisei thu an sawi a, ram tikangtu misualte manchhuah kawnga hnathawktu thuneitute pawh theihtawp chhuah tura ngenin an puih theihna apiangah puih an tum thu an sawi bawk a ni.