India ramin zalenna a neih champha vawi 72 na, Independence Day, 2018 chu ram chhung hmun dangte rualin Serchhip ah pawh hlawhtling taka hman  ani a, a lawmna pui ber Khawtetlang Field-a neihah Pi Vanlalawmpuii Chawngthu, Minister of State chu khuallian a ni.

Zing ni chhuah rualin sawrkar pisa leh zirna inah te hnam puanzar zar niin, Independence Day puala Serchhip khawpui huam chhunga Home leh Hospital hrang hrangte hnena thilpek hlanna neih kual zui a ni. Hemi hnu hian a lawmna pui ber chu Khawtetlang Field ah dar 11:00 ah neih zui niin khuallian Pi Vanlalawmpuii Chawngthu chuan hnam puanzar a pawtpharh a, hnam puanzar chibai buktu Parade Contingent te chibai bukna chhangletin, contingent te endikna a nei nghal bawk.

Thusawiin Pi Vanlalawmpuii Chawngthu chuan, zalenna zarah India ram chu kum reilote chhungin khawvela ram thiltithei berte zinga miah a inhlangkai a, Mizoram pawhin zalenna zar zovin chak takin hma a sawn chho zel a, kan State hi India ram state zinga mipui sum lakluh pun chakna ber pawl, Growth Driver State an tih zinga mi kan ni ta hial mai. Serchhip District pawh nasa takin a thang a, tun hnai maia Infrastructure lama hma kan sawnna te, mirethei chawikanna te, hriselna leh zirna lama kan than chhohna te hi chhuan tham a tling a ni, a ti. District Agriculture Office thar te, ATMA Building thar te, Tourist Lodge thar te, Boxing Hall te, SE Highway Building thar te, District Fisheries Development Office thar te, Fire Station thar te, Police Thana Building thar te, District Court thar te, District Research Office thar te, District Education Complex thar te, DIET Building thar te, Panchayati Resource Centre thar te, Nursing Collge Building sak mek te, Serchhip Auditorium thar te, Sport Complex thar te tun hnaiah Serchhip kan nei a. Inkalpawhna kawng lamah nise District chhunga kawng pawimawh tak tak panga chu PMGSY hmanga thawh mek niin Sailiamkawn to Buarpui Double lane thawh mek a ni a, Serchhip khaw chhung kawngpui zauh ngai hrang hrang NEDP atanga zauh a nih bakah NEDP atang vekin kuminah veng chhung kawng hmun 14 ah thawh a ni a, Maintenance Action Plan atangin hmun dang 17 thawh a ni bawk.  Kan District Hospital in a mamawh em em Doctor thar nikum lamah dah thar an nih hnuin NEDP atangin khawl chi hrang hrang dah zui a ni a, kuminah ringawt pawh Hospital khawl mamawh chi 14 chu dah thar a ni. Kuminah naupiang 1046 kan District ah awm tawhin an zinga 17 hi vanduai thlak takin an boral a, kan IMR chu 16.3 a ni a, MMR erawh kan nei lo thung.  Zirna lamah pawh Serchhip District a sawrkar hmalakna a tam hle a ni. Chhingchhip ah Sainik School kan nei a, Entlangah Eklavya, Thenzawl ah JNV, Govt. Serchhip College pawh University Exama topper chherchhuak thei College a ni. Tunah Chhiahtlangah Polytechnic te, ITI te sak mek an ni a, Tarpi tlangah Nursing School Building pawh zawh thawkhat a ni tawh bawk. Hengte bakah hian mi harsa zawkte chawikanna programme engemawzat kalpui mek a ni a, Mizoram sawrkar flagship programme, NLUP leh NEDP hmanga hmalakna tam tak kalpui mek  ani bawk, tiin Serchhip a sawrkar hmasawnna hnathawh langsar zualte a tarlang a. Heng hmasawnna zawng zawng te hi zalenna leh sawrkar kalphung tha tak vanga kan neih a nih avangin zalenna chawi nung zel tura kan inhlan a pawimawh tak zet a ni, tiin kal khawmte a chah a ni.

He ni lawmnaa parade contingent tithate hnenah lawmman semna neih zui a ni a, lawmman dawngtute chu; pakhatna Govt. M/S Chhiahtlang,  pahnihna Presbyterian English School, Serchhip, an ni.

A lawmna hun Playground lama neih zawh hnu hian VIP’s at Home chu sawm bikte tan DC Bungalow, Khawtetlangah buatsaih zui a ni bawk.