Vawiin khan India ram hmun dang te rualin Mizoram hmun tinah India ram in mahni a ro a inrel hranna ni vawi 72-na chu ropui taka lawm a ni. Mizoram chhunga Independence Day lawmna lian ber Aizawl Sipai Lammual a neih ah chuan Chief Minister Pu Lal Thanhawla chu khuallian a ni a; Hnam Puanzar a pawhpharh hnu ah parade contingent-ten Hnam puanzar zahna lan tira chibai an rawn buk chu  chhanglet in he ni pual a thuchah a sawi a ni. 

India zalenna champha lawm tura kalkhawm te leh Zoram mipui te duhsakna chibai Chief Minister Pu Lal Thanhawla chuan a buk a. “Zalenna sualtu mi hmasate inhlanna avangin vawiin hian India in kan zalenna tum 72-na kan lawm thei a ni” tiin Independence Day lawm rual hian ram leh hnam tana inpekna thinlung pu thar leh theuh turin mipuite a sawm a. Chief Minister chuan ram hmasawnna atan remna leh muanna pawimawh thu sawiin, Mizoram pawhin remna a chan hnu ah hmasawnna kawng zawh chho in, India rama state economy thang tha ber pawl zingah Mizoram a tel thu leh lawmawm a tih thu a sawi a. Eizawnna ngelnghet leh ramngaw chereu tawh siamthatna  tur atan NLUP hmalakna chu kalpui  a ni a ti a. NLUP hmalakna tinghet tur atan New Economic Development Policy (NEDP) chu duanchhuah leh niin, hemi hnuaiah hian hmasawnna ruhrel siam tura hmalakna hrang hrang ruahman a kalpui mek zel a nih thu a sawi a. ‘My Project, My NEDP - MiMIR (Mipui Mamawh Intawm Ruahmanna)’ chu mipui mamawh intawm siamna tur ruahmanna ah a chhawrtu tur mipuite an tel ve ngei theihna tura duan a nih thu te a sawi bawk. 

Tunlai khawvel thang zelah kawlphetha mamawhna a san telh telh avangin power lama intodelh tura hmalakna dinhmun te sawiin Chief Minister chuan Tuirial Hydro Electric Project chu Prime Minister Pu Narendra Modi an nikum December ni 16-a a lo hawn tawh thu te, New Development Bank (BRICS Development Bank) tanpuina hmangin 24 MW Tuirini Hydel Power Project thawhna tur ruahman a nih thu te, 210 MW Tuivai Hydro Electric Project thawhna turin North Eastern Electric Power Corporation (NEEPCO) nen thawhhona thuthlung ziah a nih thu te leh hmalakna dang hrang hrang a awm thu te a sawi a. Heng bakah hian NEDP hmalakna kaltlanga Mizoram chhunga pawnlam miten Investment an rawn tih theih nan a “Magnetic Mizoram” tia hmalakna avangin mimal sumdawngte nena thawhhona turin Solar Energy-ah cheng vaibelchhe 600 ziah a nih thu a sawi a. Kawlphetha intodelhna atan ni chakna hmanga kawlphetha siamchhuah Solar Energy chu sawrkarin pawimawh tiin, Vankal-a Mega Solar Park siam te, Vathuampui leh Sailama Mini-Grid SPV Plant siam te, Melriat 132 kV Sub-Station-a Grid Connected Rooftop SPV Plant siam hna te thawh mek a nih thu a sawi bawk. Chief Minister chuan Sairang a rel kawng kal tur pawh Bangladesh nen insumdawntawnna pui thei turin Kawrpuichhuah ah lak luh tel tum a nih thu leh, ram enfiah hna pawh thawh zawh a nih thu a sawi a. Chumi hnu ah rel kawng chu Lawngtlaiah lak luh tum ni bawkin, heihi tuna Kaladan Multi Modal Transit Transport Project thawh mek zawh fel a nih hun a insumdawntawnna atan la tangkai tur thil a nih thu a sawi. 

Thalaite tan khawvel thar siam chu sawrkarin a ngaihpawimawh thu sawiin Chief Minister chuan thalaite hamthatna turin games and sports ah te, zirna kawngah leh skill development ah te kawng hrang hranga hmalak a ni a ti a. Eizanna kawng tha zawk an tan a inhawn zau zel theih nan entrepreneurship development lamah te hmalak a nih tel thu a sawi a. Thalaite pawhin heng remchanna te hi hmang tangkai tura sawmin, hun lo kal zel tura khua leh tui innghahna tlak an nih theih nan an nun uluk turin thalaite a chah bawk. Chief Minister chuan Tuirial ah National Cadet Corps (NCC) Academy din a nih tur te, Tuirial ah vek hian NCC Cadet te hman tura Aircraft Simulator dah a nih tur thu te sawiin, Lungleiah NCC Battalion thar cadet 3,520 awmna tur din tawh niin, an bu khuarna tur sawrkar in cheibawl mek a nih thu a sawi bawk. 

Chief Minister chuan zirna kawngah nasa taka hmalak a nih thu sawiin, tunah Mizoram sawrkarin Medical College a nei ta chu lawmawm a tih thu leh medical college tha ber te zing ami a nih theih nan buatsaih chhoh mek zel a ni a ti a. Medical College bakah zirna sang lama thalaite pui turin state chhungah ngei National Institute of Technology te, Indian Institute of Mass Communication leh Central University a awm tak avanga lawmawm a tih thu leh thalai ten an hman tangkai ngei a duhsak thu a sawi. 

Chief Minister chuan Mizoram chu hma lam pan zel tura buatsaih a nih a, thangtharte tan hnam hmasawnna atan rohlu siam zel a nih thu sawiin, “ram leilung fate hi ram siamthatna kawngah kan mawhphurhna a inang vek a, hmasawnna ruhrel siam te hi mipui tin ta vek tur a nih avangin neitu rilru kan put tlan a kan thawhho a pawimawh a ni,” a ti a. Sum ngaina hnam a tluk mai loh nan mitin fimkhur tlan pawimawh a tih thu sawiin Chief Minister chuan “ringtu kan nihna kan nitin nunah kan lanchhuah tir thin a, ram neitu kan nih theuh angin ram hmasawnna atan mawhphurtu kan ni theuh tih mipuite hre thar turin kan inchah a ni” a ti. 

Independence Day vawi 73-na lawmnaah hian Chief Minister Pu Lal Thanhawla chuan heng a hnuaia Medal leh Award-te hi a sem a:

1) President’s Police Medal for Distinguished Service – Pu Lalbiakthanga Khiangte, DIG Northern Range leh Pu PC Lalchhuanawma, Director, Fire & Emergency Services

2) Police Medal for Meritorious Service - Pu PC Lallianthanga, SP (Wireless), Pu Vanlaltluanga Parte, Inspector, Aizawl DEF; Pu Laldawngliana, Inspector, Aizawl DEF; Pu Rodingliana Chawngthu, SP CID; Pu K. Lalremsanga, C.O. 3^rd Battalion MAP leh Pu Lalsanglura, Principal, Police Training School. Vawiina President’s Police Medal for Distinguished Service leh Police Medal for Meritorious Service sem takte hi nikum leh kumin kum tira lo puan tawhte an ni a.

3) Governor’s Gold Medal: S.I. Zangura Khiangte, 2^nd IR Battalion leh Constable H. Lalrindika, Traffic

4) Governor’s Silver Medal: Inspector H.S. Lalmuanpuia, Lunglei DEF leh Inspector F. Vanlalkima, 2^nd Bn. MAP

5) State Award for Teachers 2018 chu – Pu G.S. Zaithantluanga, Headmaster, Govt. Diakkawn High School, Kolasib; Pu Lalpiangthara, Headmaster, Govt. Chaltlang Middle School, Aizawl leh Pu H. Lalrinchhana, Headmaster, Govt. Tlungvel Primary School –II, Tlungvel te hnenah hlan a ni. 

President’s Police Medal for Distinguished Service dawng turin Pu H. Ramthlengliana, SP Traffic leh Police Medal for Meritorious Service dawng turin Pu Lalringdika, SP Serchhip leh Pu p.B. Singha, Inspector of Police, Vaivakawn Stattion bakah Fire Service Medal for Meritorious Service dawng tura Pu Lalrinmawia, Driver Special Grade, Fire & Emergency Services Department te thlan an nih thu vawiinah hian puan a ni bawk. 

Vawiina A.R. Ground-a Independence Day lawmna inkhawmah hian parade contingent 30 an tel a. Silai keng (Armed) Contingent 7 zinga lawmman dawngte chu – pakhatna 46^th Assam Rifles; pahnihna 34 Tripura State Rifles leh pathumna Mizoram Home Guards te an ni a. Silai kenglo (Unarmed) Contingent 5 zingah pakhatna chu 20^th Mizo Independent Company NCC na niin, Aizawl North College NCC ten pahnihna an hauh a, 1 Mizo Air Squadron chu pathumna an ni. School Contingent 14  zingah pakhatna chu Home Mission Hr. Sec. School an ni a, pahnihna chu St. Joseph’s Hr. Sec. School niin Greenland Hr. Sec. School te chu pathumna an ni. Parade Commander-te chu Pu C. Lalsawta, DSP leh 2^nd Commander Pu Lalpianthanga, DSP te an ni a. Band party 4 an tel bawk. Kumin Independence Day Parade-ah hian Tripura atangin Tripura State Rifles platoon khat an rawn tel a, Mizoram atang pawhin Tripura Independence Day lawmna parade ah City Police platoon khat an tel ve bawk a ni. 

Aizawl a Independence Day vawi 72-na lawmna Lammual-ah hman a nih hnuin Raj Bhavan Circular Lawn-ah At Home programme hman leh a ni a. Mizoram Governor Pu Kummanam Rajasekharan chuan sawm bik te tan thingpui ruai a buatsaih a ni. 

(Full Text of CM’s Speech: https://dipr.mizoram.gov.in/post/india-independence-vawi-72-na-chief-minister-pu-lal-thanhawla-thusawi-15th-august-2018 )