Vawiin khan Champhai District-ah Independence Day vawi 72-na lawmna chu Chhangphut Field-ah urhsun takin hman a ni a. He huna Khuallian UD&PA, Sports & Youth Services leh PHE Minister Pu Zodintluanga chuan hnam puanzar pawtpharhin, parade contingent 18-te chibai bukna a chhanglet a, Independence Day 2018 puala buatsaih U-11 Boys & Girls Badminton Tournament lawmman a hlan nghal a ni.  

Khuallian Pu Zodintluanga chuan kalkhawmte Zalenna Ni chibai bukin zalenna neih theihna tura thathawhtute, nunna hial chante leh hun harsa tak ramin a paltlang dante hre reng thin turin a chah a. India chu mahni ro inrel ram a ni a, harsa taka zalenna neih hi vawn nung zel a tul thu a sawi a. Zalenna avangin India ram chuan hmalam a pan a, khawvela ram thang duang ber pakhat a lo ni thei ta a ni, a ti. Thawhhona tha leh inpumkhatna awm chhung chuan ramin hmalam a pan ang a, chumi tur chuan mipuiin sawrkar an tawiawm that angai dawn a ni, a ti bawk. Sawrkar hmalaknaa infiamna hmunhma tha tak tak Champhaiin a neih thu a sawi a - Vanlallawma Indoor Stadium te, Chhangphut Field changtlung tak leh Champhai Zotlanga World Class Stadium siam a ni chu lawmawm a tih thu a sawi a. Aizawl to Champhai Road double lane a siam anih tur thu leh Keilungliah Recreation Centre siam tura chak taka hmalak anih thu a sawi bawk a ni.

Ramchhunga remna leh muanna siam kawngah sawrkarin chak taka hma a lak thu sawiin,  April ni 2, 2018 khan sawrkar leh HPC (D) inkarah inremna thuthlung ziah a ni a, ralthuam pawh HPC (D) ten CTI Sesawng-ah April Ni 13, 2018 khan an tung fel a ni, a ti a. NEDP hnuaiah District tinah Cheng vaibelchhe 1 hu zet mipuite mamawh intawm siamna tur ‘MiMIR-My Project My NEDP’ inelna kalpui niin District mipuiten an hlut thu a sawi. Sports Minister chuan infiamna khawvelah thalaite tan hmanrua leh hmunhma thate chhawpchhuah sak zel thu leh infiamna lama hmasawnna nasa tak a thlen thu a sawi a. Tun hnaia Women’s Hockey World Cup neih takah Kolasib nula Lalremsiami’n India aiawhin goal a khung thu leh Government Complex tlangval Jeremy Lalrinnunga pawh weighlifting inelnaa India aiawha Youth Olympic Games-a a inlan dawn thu chhuang takin a sawi.

Khuallian chuan thalaite hmakhua ngaia an thiamna leh theihna te hai chhuah sak a tul thu sawiin, ruihhlo do kawngah tan lak zual sauh a pawimawh thu a sawi a. Mipuite chu hruaitute zai ngai thiam tur leh inlungrual taka mizo nun zemawi tak pholang thin turin a chah a. Sawrkar hnathawkte thawhrimna leh inpekna a fak a, media lama thawkten sawrkar an tawiawmnaah  lawmthu a sawi bawk a ni. Mizoram ral muanna vawnghim kawnga mipui vantlang, kohhhran leh pawl hrang hrangte thawhhona chu fakin Zofate ram mawi tak Mizoram chu duat taka vawnghimtu nih tum theuh turin a chah a. Kalkhawmte chu India ram ropuina eng hnuaia zalenna lawm chunga impumkhatna, inremna leh muanna te nunpuia vawng zel turin a chah a.India ram leh Mizoramin hma a sawn zel theihna tura theihtawp chhuah turin a sawm nghal bawk a ni. 

Vawiin Independence Day March-Past hi Parade Commander Sub Inspector Jerry Lalmuanpuia Punte chuan kaihruaiin, contingent 18 zingah hian Unarmed Contingent 5, School Contingent 13 leh TNT Pipe Band-te an tel a. Parade entir zingah hian school contingent-te atangin titha pathum thlanchhuah niin,  Vengsang High School Contingent chu pakhatna a puan an ni a, Govt.R.Hranga High School Contingent chu pahnihna niin, pathumna chu Bethel Mission School Girls Contingent an ni. Unarmed Contingent zingah Mizoram Police Contingent pakhatna niin, NCC Govt. GM High School leh NCC Govt. Champhai College Senior Wing-te chuan an dawt a ni. Parade zawh hnu hian TNT Pipe Band ten Band display mawi tak an entir bawk a ni.

Independence Day lawmna hun Chhangphut Field-a neih zawh hnu hian Independence Day Chief Guest hovin official leh mi sawm bikte tan Jericho Garden, Keifangtlang, Champhaiah ‘VIP’s At Home’ function neih a ni a. Chawhnu lamah Champhai District Football Association buatsaih Independence Day Football Tournament Final khelh chhunzawm a ni a.  Final match hi Vengsang FC leh Venglai FC ten an khel a ni. 

Attachment

  • Loading attachment...