Vawiin khan Mizoram hmun dangte rualin Hnahthial Block Sports Committee (HBSC) Ground No.1-ah pawh Independence Day 2018 lawmna neih a ni a, South Tuipui bialtu MLA Pu John Siamkunga, Chairman, Mizoram State Law Commission chu Khuallian niin hnampuanzar a pawt pharh a, Independence Day School Parade Contingents 12 te Hnam Puanzar chibai buk a chhanglet bawk. 

Khuallian South Tuipui Bialtu MLA Pu John Siamkunga, Chairman, Mizoram State Law Commission chuan he ni ropui takah hian ram mipuite chibai a buk a, India ramin zalenna a neih dan leh India ram hmasawnna hrang hrangte a tarlang a. Mizoram pawhin bung thar a kai nasa em em a, Mizorama khaw hrang hrang hmel chu a danglam chho zel a, kum 1993 atang khan NLUP sem tan a nih hnuah Mizo mipui, a bikin kut hnathawktute an lo din chhuah a, mahnia eizawnna nghet an lo neih theih nan nasa takin sorkarin tan a la a, din chhuahpui pawh tam tak an awm a ni a ti. 

Khuallian Pu John Siamkunga chuan a bial chhunga hmasawnna chungchang sawiin Hnahthial chu Mizorama khua zawng zawngah tui hnianghnar ber khua a lo ni ta te, Mizoram Police Station tha leh fai thlanchhuah pahnih zingah a tel te, Mizoram khaw fai inelnaah pahnihna a ni theih bakah bial chhung khaw hrang hrang internal road leh blacktop emaw, cement emaw hmanga zut mam deuh vek a ni ta chu a lawmawm hle a ni a ti. heng bakah hian sorkar department hrang hrang building sak te, bial chhung inkalpawhna kawng a changtlung sawt tawhzia te, South Tuipui bial chu nasa taka tihhmasawn chhoh tum mek a nih thu te leh Hnahthial Town bik chu zinmite intawhkhawmnaa siam tum niin sumdawnna hmun pawimawh ber zinga siam tura hmalak chhoh mek zel a ni a ti bawk.

He hunah hian Hnahthial Officers Club HOC ten Hnahthial tihmingthatu Indian Junior hockey player Lalrindiki leh kum 91 mi Pu Kalruma khawhar ina kal a thlamuanna thu chah sawi ziahtute chawimawina an hlan a. I-Day lawmna March past-ah School Parade Contingents zingah 1-na Moriah Public School, 2-na Sapzari Memorial School leh 3-na Govt Middle School te an ni.