September ni 10 chawhma dar 11 khan Sub-Divisional Industries Officer's Office, Serchhip Darnam Tlangah Industry Department hnuaia Puanthui thlangtu chhungkaw 37 te hnenah NLUP tanpuina sem a ni. He hun hi SDIO charge la mektu Industries Promotion Officer Pu Prem Bahadur chuan a kaihruai a, Pu Robert C. Lalhmangaiha, District NLUP Nodal Officer chuan hmanpuiin, tanpuina dawngtu turte hnenah puanthui khawlte a hlan nghal bawk a ni.       

He hunah hian Pu Robert-a chuan thu sawiin NLUP hlawhtlinna tur hian lungphum pawimawh tak tak pathum a awm a, chungte chu a taka bawhzuina (implementation), a vil zuina hna (monitoring) leh midangte finchhuah leh tiphur zel tura a puanzarna (publicity) hna-te an ni tiin tanpuina dawngtu tur lo kal khawmte chu sawrkar chak tak hmalakna hmuh theiha lo lang lo dawngtute an ni a, chuvangin NLUP tihlawhtlingtu an nih ngei a pawimawh a ni a ti. 

Pu Robert-a chuan kan khawl dawnte hi khawl tha leh man to, tunlai Mizoram khawvelah chuan a bak awm chuang lova tha, dinchhuahpui tham hlawhtlinna thlen thei an ni a, zawrh suma chantir mai lovin malsawmna thlentuah hmang ngei ngei ang che u tiin a nihna tura hmang lo an awm leh awm loh chu thawktuten an la enzui zel tur thu a sawi a, NLUP Display Board pawh kawngka luchung emaw, khawi emaw remchang leh langsar laiah tar ngei turin tanpuina dawngtute chu a chah a ni. 

Tanpuina dawngtute hi Serchhip District chhunga Cluster pathum Serchhip Cluster, Tuikum Cluster leh Hrangturzo Cluster a mite an ni a, Khawl nei tawh ten pawisa fai ` 58,000/- dawngin a la nei lo ten Puanthui khawl Electric hmang chi Janome, Usha Company siam leh Over Lock leh Kekhawl pakhat theuha an dawn bakah an bul tanna tur atana puanthan leh thil tul dang lei nan ` 22,486/- an dawng bawk a ni. Heng tanpuina sem zawh hnu hian Usha company mithiam ten khawl hman dan tur chungchangah tanpuina dawngtute hi training an pe nghal a ni.