Horticulture Mission for North East & Himalayan States (HMNEH) hnuaia Mizoram sorkar, Horticulture department leh Israel sorkar thawh dunna, Zo-Israel Orange pilot project, Rulpuihlim ami chu hlawhtling taka hlen chhuah a nih hnuah nimin khan serthlum thar hmasa ber chu seng a ni a. Horticulture Minister Pu H.Liansailova’n serthlum sengna hun hi a hmanpui a ni.

Zo-Israel serthlum thar sengna pual hian Pu Lalduha leh Pu Lalhuma te huanah Harvest programme buatsaih a ni a. Khuallian Pu H.Liansailova chuan thu sawiin kum 2008 atanga bul lo tan tawh, Zo-Israel Orange cultivation hlawhtlinna hmel hmuh tur a lo awm ta chu Mizoram tan thil chhinchhiah tlak a ni, tiin sorkar project pawimawh tak hlawhtlin na tura theihtawp chhuahtu, huan neitute chungah lawmthu a sawi a. Hetih rual hian he project atana thlan chhungkaw 49 zingah ti puitling lova hlawhchham 12 vel an awm chu pawi a tiin nasa zawka tan lak a tul zia a tarlang.

Zo-Israel serthlum project hlawhtlinna tura Horticulture department leh Israel mithiam ten tha leh zung an sen nasat zia sawiin Pu Liansailova chuan serthlum tam vanga harsatna a thlen tawh loh nan he project kalpuina tur ram, leilung leh ruahtui awm dan te uluk taka zir hmasak a ni a. Huan neitute chu serthlum chi tha leh hmanrua nen puiin mithiam ten a bul te atangin an vil a. Huan neitu ten mithiam te thurawn anga duat taka an ser an enkawl zui a pawimawh hle a ni, a ti a. Rulpuihlima serthlum huan neitute chu chik taka an ser kung awm dan te zir a, Mizoram puma serthlum chingtu te hnena zirtirna pe chhawng thei tur leh, University zirlai te pawhin research beh chhan atan an hman theih tur khawpa ser enkawl dan thiam tum turin a chah a ni.

Ei leh bara intodelh a tul zia sawiin Pu Liansailova chuan Mizoram hi “subsidy syndrome” in a tibuai hle a ni, a ti a. Nakin lawka Rel leh Tuikawng inhawng tur thlirin thlai leh thei thar chhuah tipung tura lo in hmakhua a tul tak zet a ni, a ti bawk a. Ei leh bara intodelh tura Mizoram sorkar hma lakna tam tak zinga pakhat chu NLUP a ni, tiin hemi atana sum lo kal dan ah buaina tur a awm lo, a ti a. NLUP hnuaiah mi tam takin serthlum chin an thlang leh ta a, an hlawhtlin pui ngei theih nan leh serthlum tam a awm tawh loh nan mithiamte thurawn anga thlai tiak thlan ah te, ser kung enkawl na kawngah te beneficiary te an fimkhur a tul hle a ni, a ti a. NLUP dawng hmasatu zinga hma la tha lo te chu sorkar hmelma an ni, tiin Pu Liansailova chuan kut hnathawktute tana sorkar hmalakna hrang hrang te chu a dawngtu lam ten taimakna leh rinawmna nen an dawnsawn ve a hun tawh tak zet a ni, a ti.

Khualzahawm, Pu K.S.Thanga Parliamentary Secretary pawhin thu sawiin Mizoram kut hnathawktu tam ber chu kum upa lam an ni a. Thalai zawk ten kut hnathawh an bansan zel chuan Mizoram hma lam hun chu a ngaihtuah awm hle a ni, a ti a. Mizorama serthlum tamna chhan pakhat nia mithiam ten an sawi chu enkawl leh chawm that tawk loh vang a ni tih tarlangin Pu K.S.Thanga chuan serthlum atanga hlawkna tel tur chuan huan neituten an serkung te chu an ranvulh anga duat a, an chawm that a pawimawh hle a ni, a ti bawk

Serthlum thar sengna inkhawm hi Horticulture Secretary Pu T.Sangkunga’n a kaihruai a. Pu Samuel Rosanglura Director Horticulture chuan he project lo pian chhuah dan sawiin kum 2006 ah thawh hona thuthlung siam a ni, a ti a. Dr.Elizabeth Saipari, Jt.Director, Citrus Specialist chuan serthlum chingtute tana hriat tur pawimawh te a sawi bawk a. Israel Chamber of Commerce Executive Member David Ashkenazy pawhin Mizoram sorkar nena thawh hona hlawhtling taka hlen a lo ni ta chu lawmawm a tih thu a sawi.

Zo-Israel Orange project atan hian Rulpuihlim ram18 Ha vel a zauvah chhungkaw 49 te chu serthlum chi 4 - Michal, Satsuma, New Hall leh Zo Mandarin te chin tir an ni a. Beneficiary te serthlum tiak leh huan enkawlna hmanraw pawimawh te tumsak an nih bakah an inhman tawm turin tuizem 13 siamsak an ni a. An vaiin thlam sak sak vek an ni bawk a. Kum 4 chhung serthlum thar hma a an intun nun nan thingfanghma chi tha chintir an ni bawk a ni.