Vawiin chawhnu dar 1.00 khan Parliamentray Secretary Pu Lal Thanzara chuan Mizoram Workcharged Employees Association khawmpui vawi 6-na, Chanmari Hall-ah a hmanpui.

Pu Lal Thanzara chuan, “Sawrkar hnathawkte hi lungrual tak leh thahnemngai taka hna kan thawh chuan kan ram hmel hi kan tidanglam thei a; sum leh pai eiruk chauh ni lovin, office hun vawn dik loh te, sawrkar bungrua renchem lohte thleng hian eirukna a nih avangin kan inthiarfihlim tur a ni” a ti a. MWEA member-te chu sawrkara an chanvoah lungawina nei tura chahin, “Mi tam takte chu mahni hlawh leh dinhmunah an lungawi lova, sum hlawh tur ringawta hnathawktu tan chuan hlimna aiin phunnawina tur a tam thin a. Chuvang chuan, kan hnathawhna kawnga mi tinin kan mamawh chu – tumruhna, taimakna leh thuawina – a ni” a ti.

Pu Lal Thanzara chuan tun laia Mizoram chhunga kawngpui chhia a tam chu sawrkar pawhin pawi a tih thu sawiin, “Heng highway te, khawpui kawngte leh Mizoram University kawngte siamthatna tur hian pawisa a awm a, mahse, ruahsur reng karah chuan siam theih a nih loh avangin khua a thal veleh atanga bung tan thei turin PWD lam an inpuahchah mek a ni” a ti. Mizoram leilung chu a sakhat tawk loh avanga motor rit tak tak rah tura kawngpui siam chu thil harsa tak a nih bakah, kum khatah thla 4 bak kawng siam hna thawhna hun a awm loh thu pawh Pu Lal Thanzara chuan sawiin, “Highway bik phei hi chu Central atanga pawisa local a nih angin tender chhangtute thlan thu-ah te Central lam an rawn inrawlh thuk em thin avangin duh ang huna hna tan mai theih loh chang a tam a ni” a ti bawk.

Pu Lal Thanzara chuan sawrkar hnathawkte anga thlabi a hlawh nei ve lote dinchhuahna turin sawrkarin NLUP hmangin miretheite rahbi a tuksak mek thu sawiin, “Hetiang khawpa Central sawrkar inhawnna hi a awm leh ngai an gem tih a sawi theih loh a, chuvang chuan Mizo mipuiten dinchhuahna atan kan hman ngei theihna turin sawrkar kan tawiawm a ngai a ni” a ti bawk.

Mizoram Workcharged Employees Association hi kum 1997 khan Lunglei-ah din tan a ni a; hemi hnu hian an pawl General Heagquarters chu Aizawl-ah suan a ni a; tunah hian PWD, PHE leh Power &Electricity department hnuaiah member 1600 vel an awm a ni. Sawrkar hnathawk nghette angin hlawh leh hamthatna dangte pek an ni a; anmahni enkawlna atan hian sawrkar chuan CPWD Manual Vol- III, 2002 chu a hmang mek a ni.

Vawiina MWEA khawmpui hian an pawl hamthatna tur thilte an rel bakah, kum 2012-2014 chhunga an pawl hruaitute an thlang nghal a. An pawl aiawhin President Pu K. Laltinchhawna chuan thu a sawi bawk.