Mizoram tlawha lo zin National Commission for Protection of Child Rights (NCPCR)New Delhi-a Special Adviser, Dr. L.Mishra chuan vawiin khan Chief Secretary Pi L. Tochhawng chu Mizorama naupangte humhimna dan Child Rights chungchang a sawipui.

Dr. Mishra chuan naupangten an chanvo dik tak an chan theih nan humhimna an mamawh a, HIV/ Aids laka venhimna pek te, Sorkar Laipui policy anga sikul an kal theih nan te, sikul kal lo drop-out a tlem theih nan te leh Mizoramin naupangte humhimna dan mumal tak a neih theihna tura hmalak a tulzia a sawi a. Chief Secy. Pi Tochhawngi chuan state sorkarin hemi kawnga hma a lak dan te sawiin, harsatna awm mek pawh a rang lama chingfel turin hnathawh mek a ni a ti a. India ram state dangte aiin Mizoramah naupangte dinhmun a tha rih hle a ni a ti tih Dr. Mishra hi a hrilh a ni.

Hemi hnu hian State Guest House-ah Social Welfare Secy. Pi B.Sairengpuii leh Health Secy. Pi Esther Lalruatkimi te bakah Education Dept. hnuia SSA hotute leh MSACS hotute nen inbiakna an nei a. Dr. Mishra chuan sikul tihchangtlun a tul thu te, zirtirtu trained loh 3000 zet awm te leh naupang sikul kal lo tam tak an awm chu a ngaihmawh thu a sawi a, tan la turin dept. hotute hi a ngen a ni.

AIDS/HIV laka invenna te, damdawi hmansual leh dan dik lova hralh khuahkhirhturinsorkar leh tlawmngai pawlte bakah kohhran hruaituten hma la se a tha a tih thu a sawi a ni.

MHIP, CPD, Childline, SABRA leh tlawmngai pawl dangte chuan vawiin vek khan Dr. Mishra hi kawmin naupangte humhimna dansiamkawnga harsatna awm leh  Mizoramin a mamawh hrang hrang an sawipui bawk a ni.

Attachment

  • Loading attachment...