Hmarchhaka Bioinformatics Center te intawhkhawmna ‘5th Interactive Meeting for North East Bioinformatics Centers (NEBInet)’ chu vawiin khan Education Minister Pu Lalsawta, Higher & Technical Education Department chhangtu ni bawk chuan Tourist Lodge-ah a hmanpui a.  Ni hnih awh tur (11 – 12 October) NEBInet meeting vawi 5-na hi Mizoram University-a School of Life Sciences hnuaia awm Department of Biotechnology in Sawrkar Laipuia, Ministry of Science & Technology, Department of Biotechnology (DBT) tanpuina in an buatsaih a ni.

Pu Lalsawta chuan thing leh mau, nungcha leh savate hausakna nei Hmarchhak bial, Bio Diversity Hotspot tih hial khawpa hriat hlawh chu a potential hria a, Department of Biotechnolgy in an ngaipawimawh chu lawmawm a ti a. Biotechnology subject chu Hmarchhak bial a state tam zawk te tan thil thar  ni  mah sela, Department of Biotechnology in Hmarchhak-a Biotechnology tihhmasawn nan leh Hmarchhak miten Biotechnology lamah thiamna sang zawk an nei theih nan an hnathawh mek te leh hemi lamah ruahhmanna chi hrang hrang an duan chuan rah tha a chhuah ngei a beisei thu a sawi a.

Education Minister hian Hmarchhak bial chhunga a Univeristy zawng zawng leh College thenkhata North East Bioinformatics Network (NEBInet) hnuaia Biotechnolgy tih hmasawn nan Bioinformatics Center 28 lai mai Department of Biotechnology ruahmanna kaltlanga din chuan Hmarchhak ah hian hmathar lakna tur tam tak a la awm tih leh Sorkar Laipui chuan Hmarchhak hi a ngaihsak a ni tih a ti lang chiang hle a ni, a ti bawk. Meeting hlawhtling taka neih a nih theih nan a duhsakna a hlan a.  Pu Lalsawta hian 5th Interactive Meeting for North East Bioinformatics Centers, thu leh hla tlangpui ziahna bu ‘Proceedings’ chu he hunah hian a tlangzarh nghal a ni.

Mizoram University Vice Chancellor, Prof. R. Lalthantluanga chuan inlawmna thuchhah sawiin meeting hian Hmarchhak pum tan Biotechnology than zelna leh tihlar kawnga rah duhawm tak chhuah a, nasa takin a puih ngei a rin thu a sawi lang a ni. Thusawitu dang, Scientist hmingthang NEHU Vice Chancellor lo ni tawh leh tunah National Advisory Committee (NAC) Member ni lai mek Prof. P. Tandon chuan Hmarchhaka Biotechnolgy a bikin ramhmul damdawi (medicinal plants) leh floriculture chuan potential sang tak a neih thu a sawi a. Biotechnolgy tana ki pui pakhat Bioinformatics than zelna tithuanawptu chu Hmarchhak a inthlunzawmna (connectivity) chhe lutuk hi a ni a ti.

Meeting Keynote Address petu, Department of Biotechology-a Advisor, Dr.  T. Madhan Mohan chuan a thusawi ah hian DBT in Hmarchhaka Biotechnology in hma a sawm zel thei nan ruahmanna leh hmalakna hrang hrang an kalpui mek te a tarlang a, hemi atan hian kum 3 kalta khan Rs. 300 crores vel sen a ni tawh thu a sawi lang bawk.  Meeting ah hian Department of Biotechnology-a Joint Secretary leh Financial Adviser ni bawk Pi Anuradha Mitra pawhin thu a sawi a ni.

NEBInet hian North Eastern Hill University (NEHU) Shillong chu Nodal Centre a neiin Hmarchhak a zirlai ten Biotechology an hmelhriat nan Institutional Level Biotech Hub 86 leh State Level Biotech Hub 6 an awm mek a. Heng Hub te hi laboratory changtlung tak leh e-journals te nen thuam niin training an pe thin a. Hmarchhak a Zirna In sang zawk a din Bioinformatics Center te hian research lam an khawih tel a, Hmarchhak pawm lamah Zirna in hmingthang ten nen research lama thawhhona an nei thin a. Kum thum kalta khan Hmarchhak scientist 60 vel in Biotechnology lamah thiamna sang zawk an neih nan Overseas Fellowship leh Associateship an lo dawng tawh a ni.