Vawiin khan Serchhip I&PR Conference Hall-ah Serchhip District Integrated Child Protection Scheme (ICPS) hnuaia thawktuten ICPS chungchang sawifiahna leh an hnathawh dan kalhmang te sawifiahna hun an hmang a, Serchhip District Superintendent of Police Pu Milind Dumbere IPS chuan he hun hi hmanpuiin, Principal Magistrate Pu T. Lalhmachhuana MJS, tlawmngai pawl hrang hrang aiawhte bakah ICPS in a a thawhpui Department hrang hrang aiawhte leh thuthar lakhawmtute pawhin he hun hi an hmanpui a ni.

Pi R.Lalramdinmawii, Protection Officer (Institutional Care), Pi Liansangpuii, Protection Officer (Non-Institutional Care) leh Pi Lalramsiami Sailo, Legal & Probation Officer ten ICPS kalphung leh hnathawh dan te sawifiahin, ICPS in a tum ber chu naupang te chanvo leh pianvo dik tak humhalh a, hmalam hun eng leh hlimawm an neih theih nan leh thlamuang taka an nunkhua an hman theih na tur a tanpui anih thu an sawi a, naupangte hi chhungkaw hlutna leh nunphung hriattir leh zirtir a pawimawh zia leh kawng dang a awm tawh thlawt lo anih hunah chauh Fahrah Enkawlna In (Orphanage Home) a dah tur an nih thu te sawi lan a ni a, mahni thu a fa lo lak (adopt) ringawt hi dan in a phal loh thu te leh dan ang thlapa fa lak (adopt) anih chuan a him zawk thu te pawh tar lan niin naupang te enkawl chung changah dan ngaihpawimawh a tul zia uar takin an sawi a ni. Serchhip ICPS staff te chuan thawktu an indaih loh avangin naupang tanpui ngai leh chhan ngai te dap chhuah kawngah tlawmngai pawlte, a bik takin MHIP leh YMA te chu thawh ho puiah an sawm a, Child Welfare Committee thutkhawm kartin zirtawpni apianga neih anih avangin heng huna ngaihtuah tur hian ICPS staff te hnenah emaw CWC member te hnenah emaw a theih ang ang a tanpui ngai an hriat te hlanchhawng thin turin an ngen nghal bawk a ni.

Juvenile Justice Act hnuaiah kum 18 la tling lo chin zawng chu naupang a chhiar an ni a, heng kumtling lo dan bawhchhe tute man tur bik hian Special Juvenile Police Unit Serchhip-ah din a ni tawh nghe nghe a ni. Juvenile Justice Act hnuaiah chuan naupang dan bawhchhia man an nih reng rengin mantu police te chuan sipai uniform an ha tur a ni lova, civil thuamin an inthuam tur a ni bawk, kutkawl (handcuff ) bun tir loh tur an nih bakah lock-up ah dah phalloh an ni a, police te hian darker 24 aia rei an kawl theih loh bakah man an nih in an chhungte awm hnaivai ber an hriattir ngei ngei bawk tur a ni.

Integrated Child Protection Scheme (ICPS) hi Sawrkar Laipuia Ministry of Women & Child Development hnuaiah kalpui niin Mizoramah chuan Social Welfare Department in a enkawl a, Aizawlah State Child Supporting Unit awmin Mizoram chhung District zawng zawngah DCPS a awm vek tawh a ni.

Vawiin inkawm khawmna hun hi Pu Lalbiakliana, Circle Officer (ICDS) in a kaihruai a, chawhnu lamah zawhna leh chhanna hun hman a ni bawk.