Khawvel ram hrang hrang ten kum tina an hman thin International Day for Biological Diversity chu vawiin khan Environment & Forests Minister Pu H.Rohluna hovin DIET Auditorium, Chaltlangah Environment &Forests Department huaihawtin hman a ni.

Minister chuan khawvel leh a chhunga chengte hi inmamawh tawn leh inchawm tawn tura duan an nih angin thilnung engmah amah maiin a damkhawchhuak theilo tiin min hualtu thilnung chi hrang hrang, thing leh mau, rannung leh ramsa te humhalh a venhim a pawimawhzia a sawi a. Inring tawn kan nih angin Biodiversity tichhe zawng ngawta mihring te kan khawsak chuan a chhe zawnga a nghawng tuar nasa ber tur pawh anmahni a innghat mihring te kan ni, a ti. Pu H. Rohluna chuan Biodiversity pawimawhzia hria a, humhalh nachang hre tur chuan zirlai te rilru a tuh hmasak a tul a, chutiang ti tur chuan DIET a zirtirtu thawk lai leh la thawk mai tur Training lai te an pawimawhzia sawiin sikul naupang te thinlungah tuh nghet turin a chah a. Humhalh nachang kan hriat chuan nakina thangthar lo la awm zel tur te tan leh tun kan damchhung ngeiah pawh a hlawkna tam tak kan tel dawn a ni, a ti. Biodiversity humhalh a pawimawhzia hriain India sorkarin a humhalhna tur dan Biodiversity Act 2002 leh Biodiversity Rules 2004 a siam a, Mizoramah pawh mumal taka humhalh a nih ve theih nan Mizoram Biodiversity Rules 2010 siam a lo nih tawh thu pawh E&F Minister hian a tarlang bawk.

He huna thusawitu dang Principal Chief Conservator of Forests Pu SS Garbyal pawhin India ram chu khawvel ram dang te nena khaikhina Biodiversity hausakna ram a nih thu leh hmarchhak bial te hi India ramah pawh Biodiversity-a hausa ber pawl an nih avangin an vannei tak meuh a ni, a ti a. Biodiversity hausakna hi hausakna azawnga mihring te ngaihhlut leh ngaihsak hlawhlo ber te zing ami a ni a, ram changkang apiangin a hlutna hriain an humhalh thung tih sawiin PCCF chuan Biodiversity-a hausa tak Mizoram pawh hi a chhunga cheng ten a tichereu zawng ni lovin a humhalh zawnga an khawsak a tul a ni, a ti.

International Biodiversity Day hi United Nations General Assembly ruahmanna angin 1993 atanga hman tan a ni a. Kum tin thupui thlan bik neiin khawvel pumah hman thin a ni a, kumin Biodiversity Day thupui chu tuifinriat leh tuipuia thilnung te chungchang “Marine Biodiversity” a ni.

International Day for Biological Diversity, DIET Auditorium-a neihah hian mithiam hrang hrang Zothansiama, Sr. Research Fellow, Zoology Dept., MZU te; Samuel Lalronunga, Research Scholar, MZU te; David C. Vanlalfakawma; Dr. Saithantluangi Zote leh Dr HT Lalremsanga ten thupui thlanbik hmangin kalkhawm te an zirtir a ni.