Vawiin khan Chief Secretary, Pu Van Hela Pachuau IAS, in Bethel Camping Centre, Chawnpui a awm ten Exhibition- Cum- Sale an buatsaih Vanapa Hall chungah a hawng. Hawnna inkhawm mawlte buatsaih hi an Camp Speaker Pu T.T. Zohmingthanga’n a kaihruai a, hunserh Rev.K.Lalzuala, Chairman, Set Free Ministries in a hmang.

Pu Van Hela Pachuau chuan hawnna thu sawiin, hetianga Camping Centre a awm ten Painting leh thil tangkai chi hrang hrang mawi leh tha tak tak pho chhuah tlaka an siam thei hi a ropui takzet a. An kutchhuak han en hian India ram pawn thleng pawh a pholan tlak a tling hlawm a ni a ti a. Heng an thil buatsaihte hi mi chawmhlawm ringawta awm lova mahni intodelh nana an tih a ni a, mipui pawhin kan hlutsak thiam a pawimawh hle a ni a ti.

Pu Van Hela chuan kan rama tanpui ngai leh chhawmdawl ngaite chhawmdawl hna thawk tur hian kan mi hausa leh awm thei deuhte pawh tun aia inhmang tangkai deuh deuh turin a sawm a. Ram leh hnam tana rawngbawlna pawimawh tak anih rualin vanah ro kan khawl khawmna tur a ni a ti.

He Exhibition hi Vanapa Hall chhawng chungah neih mek a ni a. May 22 - 25,2012 thleng a awh dawn a ni. An thil siam lei duhte chuan an hauh lawk ang a, Exhibition zawh ve leh lak theih a ni ang.