982/2026-2027

Dated Serchhip, the 12^th June 2026: Vawiin khan Integrated Tribal Development Programme, Serchhip leh E.Lungdar Block-a kalpui tur hawnna hun Serchhip DC Pisapui Hall-ah hman a ni a, Dr. KC Lalmalsawmzauva, Advisor to CM (Implementation of Handholding Policy) chuan khuallian niin a hmanpui.

Khuallian chuan thusawiin Mizoram sawrkarin a kalpui mek Bana kaih hi a thlawna sem tawp nilovin project base zela hmalak a ni a, engtia kalpui nge kan tum tih hi ngun taka ngaihtuah thin tur a ni, a ti. India rama district 802 zinga ziak leh chhiar thiam tamna ber an nih avangin vawiina kalkhawm kut hnathawktute lakah hian beiseina sang tak an neih thu sawi a ni. Sum hi hmasawnna nena kalkawpah kan ngai thin a, sum ngah ringawt hi hmasawnna a ni ber lo a, hmasawnna chu rilru lam thil a ni a ti a ni. Engkim hi taimaknain a hrinchhuah a ni a, keimahni theuhin kan zir a ngai a ni, a ti a. Progress Partner atana thlangtute kan fair a, a dawngtute pawh in fair kan beisei  a ni, a ti bawk.

Pi Lalchhuansangi, Project Director, ATMA Serchhip District chuan inlawmna leh Project kalpui dan tur leh hmalak dan tur tlangpui a sawi a. NABARD Tribal Development Fund leh Mizoram CM Bana Kaih Scheme tangkawpa kalpui tur a ni a, Implementing Agency chu ATMA Serchhip District a nih thu a sawi. Project hi kum 6 chhung kalpui tur niin, sum sen tur hi Rs. 618,36,000 niin, NABARD share chu  Rs. Nuai 398,14,000 a ni a, Bana Kaih share chu Rs. Nuai 93,97,000 a nih thu a sawi bawk. Project hmalakna tur atan khaw 7 thlan niin, Hualtu, Hmuntha, Khawbel, Sialsir, Serchhip, Chhiahtlang leh Thenzawl an ni a, Thlai chin tura an thlan te chu Tung leh Chhawhchhi emaw Bekang chin kawp tur niin, Ser (Lemon) leh Sawhthing emaw Behliang dal (Arhar) chin kawp tur a ni a, Litchi leh Lakhuhthei te chin kawp tur a ni dawn bawk a ni. He project hnuai tanpuina dawng tur hian mi 400 an thlang a. Heng bakah hian Handloom and Tailoring Sector awm bawkin, hetah hian mi 100 thlan an ni bawk a ni.  

Pu Lalrokunga Chhakchhuak, Dy. General Manager, NABARD chuan thu sawiin Serchhip a kuthnathawktute chu he project ah an lo lut ta sa sa a, hlawhtling ngei tura theihtawp chhuah turin a sawm a. Taimakna lo chuan hlawhtlinna a awm lova, he project a hlawhtlin nan chuan kan zavaia tanrual a ngai a ni. Beneficiary ten mahni tan chauh ninlo, kan ram tan theihtawp chhuah ang u, tiin a sawm a ni.

Pi Vanramthangi, Director, Agriculture & Farmers’ Welfare Department pawhin thu sawiin sawrkar chu theihtawpin a tang a, beneficiary te pawhin theihtawp lo chhuah ve turin a sawm a. Harsatna an nei a nih chuan tanpui turin department lam an inring reng a ni, a ti. Sawrkar hnathawh aiin kuthnathawh hi a hlawk zawk a ni tih thangtharten an lo hriat theih nan theihtawp chhuah tura chahin, ram leilung tha tak Pathianin min pek hi hmang tangkai a, a rah sengtu ni theuh turin duhsakna a hlan a ni

DC Pu Paul L Khuma pawhin thusawiin he project avang hian kut hnathawktute thar chhuah hi lo pung sela, hlawhtlinna sawi tham nei theuh turin a duhsakna a hlan a. Department hotute pawhin an beneficiary te an hnathawhna hmunah enpui fo thin ni sela, chu chuan rah tha a chhuah ngei a beiseia thu a sawi a ni.

He hun hun hi Pu Gregory Malsawmkima, Dy. Project Director, ATMA chuan a kaihruai a. He Project hnuaia khaw hrang hrang atanga tanpuina dawng turte an tel a ni.