983/2026-2027

Lunglei, 2026 Nikir thla ni 12: Vawiin khan DC Conference Hall, Lungleiah Mahatma Gandhi National Rural Employment Guarantee Act (MGNREGA) Scheme thlakna tur Viksit Bharat—Guarantee for Rozgar and Ajeevika Mission (Gramin) VB–G RAM G chungchang inhrilhfiahna hun, "Orientation Programme" buatsaih a ni. Lunglei District chhunga Head of Office-te leh Rural Development hnuaia Block Development Officer (BDO) leh staff eng emaw zat telin, BDO a hmuna kal lote pawhin biakhmuhtheihna (video conference) kal tlangin an chhim bawk.

He hun hi Lunglei District Bawrhsap (Deputy Commissioner) Pi Navneet Mann chuan hmanpuiin, scheme hrang hrangte hlawhtlinna tura theih tawp chhuah tlang tur leh department hrang hrang inkara thawh hona ṭha vawng zel turin kal khawmte a chah a. Department hrang hrang inkara hna thawh dan inhriatpui a, inlaichinna leh inpawhna ṭha neih chu scheme hlawhtlinna atan leh mipuite'n a nih dan tur taka scheme an chhawr ṭangkai theih nan a pawimawh thu a sawi.

Lunglei District Rural Development Office (DRDO) Project Director Pi Zoramdini chuan inlawmna thu sawiin, MGNREGA chu kum 20 dawn lai hman a nih hnuah tihtawp mai tur a nih tawh thu leh July 2026 aṭangin a thlakna tur VB–G RAM G chu hman a nih dawn thu a sawi a. He scheme thar hi India indan kum 100 tlin hriat rengna tura sawrkar ruahmanna Viksit Bharat Vision 2047 tihlawhtling tura buatsaih a nih thu a sawi.

DRDO Works Manager Pu Ramnunsanga chuan MGNREGA leh VB–G RAM G danglamna hrang hrang pawimawh zualte Powerpoint Presentation hmangin a sawi fiah a. MGNREGA chu ni 100 inhlawhna a nih laiin, VB–G RAM G-ah chuan ni 125 inhlawh a ni tawh dawn tih sawiin, hna thawh theih (permissible works) zat pawh 266 aṭanga 318-a tihsan a nih thu a sawi a. Tuna MGNREGA inhlawhna rate ₹281 chu tihsan a nih dawn thu leh he scheme atan hian North East state bikah Central leh State-in suk (fund) 90% leh 10%-a an intum sem tur thu a sawi bawk.

DRDO MIS Nodal Officer Pi HK Lalrintluangi chuan MGNREGA/VB–G RAM G scheme kalpui dan tura online system hmanga hna thawh dan kalhmang tlangpui a sawi fiah a. Zawhna leh chhanna leh sawi hona hun hman a ni bawk.