984/2026-2027

Aizawl, 12 June 2026: Health Minister Pi Lalrinpuii chuan vawiin khan Mizoram Sorkar, Health & Family Welfare Department hnuaia drug license, cosmetic license leh medical device registration chi hrang hrang pekchhuahna tur National Digital Platform-Online National Drug Licensing System (ONDLS) leh FDA Integrated Reporting & Monitoring System (FIRMS) Mizorama hman theih turin a tlangzarh.

Minister chuan Mizote chu thil thiam chak tak kan nih thu a sawi a; he portal thar hian 'Ease of Doing Business' kawngah min pui a beisei thu a sawi bawk. Mizoram chu ram pumah 'most digitized state' ni tura kan Chief Minister-in hma a lak nasat thu tarlangin, Health Department pawhin online-in hna a kalpui nasa a; chung zingah chuan, MUHCS hnuaia online registration kalpui mek pawh a tel a, thawktute leh a hmangtute tan hna a awlsam phah thu a sawi. He portal-te hi mipuite leh thawktute'n ṭangkai taka an hman a beisei a; Sorkar, Pharmacist, leh Druggist-te thawhhona tha a pawimawh hle a ni, a ti. 

ONDLS hi Government of India, Ministry of Health & Family Welfare-in Digital India Vision tihhlawhtlinna tura a kalpui mek a ni a, Central Drugs Standard Control Organization (CDSCO) leh Centre for Development of Advanced Computing (CDAC) te tangkawpin Central leh State/Union Territory Drug Control Authority zawng zawngte hman tura buatsaih a ni. Damdawi, Cosmetics leh Medical Device-te hi Drugs & Cosmetics Act, 1940 leh Rules, 1945 hnuaia licence nei thlapa siam emaw zawrh theih an ni ; technology hmasawn zel karah, India ram puma damdawi licence pekna leh enkawlna chu system pakhat hnuaia felfai leh inang tlang taka kalpui a nih theih nan ONDLS hi duanchhuah a ni.

ONDLS hi CDSCO, Ministry of HFW chuan state tinte hmang tura tiin, state thenkhat Online system dang hmangte pawh ONDLS-a inchhung khawm turin a ti bawk. Mizoram FDA pawhin ONDLS hman tumin, Health Department-in sawrkar leh mipuite tana a thatna leh hlawk zawkna tur kawng hrang hrang a zirchian hnuah ONDLS chu Mizorama hman theih turin Notification May 22, 2026 khan a chhuah ta a ni.ONDLS hnuaia kalpui turte chu heng service hrang hrang – Drugs Manufacturing license, Cosmetics Manufacturing license, Retail license, Wholesale license, Blood Centre license, WHO GMP Certificate of Pharmaceutical Product (COPP) te hi an ni. 

FDA Integrated Reporting & Monitoring System (FIRMS)-ah hian thil pahnih a awm a, pakhat chu FDA Officer-ten Monthly Report an pekna tur a ni a, pakhat dang leh chu damdawi ruih theih khuahkhirh ngai zual lakluh leh hralh vil zuina tur a ni. Damdawi zingah hian ruih nana hman sual theih tam tak a awm a, chung damdawite chu doctor chawh chauhva hralh tur (Prescription drugs) an nih laiin, doctor chawh lohva hralh ral a tam hle a. Heng damdawite hi Mizorama lakluh khap ngawt a rem si loh avangin, hmansualna tur ven nan leh vilzui nana tih a ni.

FDA DINHMUN THENKHAT

1. Drugs License dinhmun (June, 2026 thleng)

2. Damdawi quality endikna dinhmun: FDA hnuaiah Mizoram State Drug Testing Laboratory (DTL) hman tur Khawl pawimawh zualpui neih kim loh avangin sawrkarin hma a la mek a. FDA Officer drugs testing lama experience nei sa pahnih, Drug Inspector leh Assistant Drug Inspector-te chu DTL-ah attached an ni. Laboratory equipment leh reagents, consumables pawh DPAB-in phalna a pek anga lei fel tawh niin, DTL hman theih hma chuan Regional Drug Testing Laboratory (RDTL), Guwahati-ah sample thawn thin a ni.

3. Blood Centre Licence

• District Hospital 8 leh ZMC&H, Presbyterian Hospital Durtlang leh Christian Hospital Serkawn (Total 11) Blood Centre Licence nei an awm.
• Blood Storage Centre Licence nei sawrkar hospital 12 leh private hospital 2 (Total 14) an awm mek bawk.

4. Damdawi Ruih Theih Hmansual Venna:Damdawi ruih theih nana hman sual theih dik lo taka khawih thinte chungchangah FDA chuan hma a la reng a, Show Cause Notice pawh tam tak pek a ni.

5.Absence of Pharmacist: AMC area-a pharmacy tam takah pharmacist an awm reng loh thu hmuh a ni. May – June 2026 chhungin licence 94 endik a ni a; chung zinga 7 chu pharmacist an neih loh avangin suspend an ni.

6.Revenue:FDA hian Drug Sector leh Food Sector atangin revenue heng ang hian a hmu:

Programme hi Pi K. Lalrinzuali, IAS, Commissioner & Secretary, Health & Family Welfare Department-in a kaihruai a, Pu F. Lalliantluanga, Joint Director (F&D), Controlling & Licensing Authority-in ONDLS leh FIRMS chungchang sawifiahna a neih bakah Pu K. Lalngilneia, Assistant Director (F&D)-in system pahnihte demonstration a nei bawk a ni.