Vawiin chawhma dar 11:00 khan Serchhip DC Meeting room-ah Serchhip District chhung Assembly Constituency pathuma inthlan buaipuitu tur, mawhphurhna hrang hrang neite tan training neih a ni. He trainingah hian political party leh candidate-te senso leh dan bawhchhiatna a awm leh awm loh viltu tur team hrang hrang; Video Surveillance Team te, Static Surveillance Team te, Flying Squad te, Video Viewing Team-te leh Accounting Team te koh khawm an ni a, Pu Lalsangliana MCS, Additional DC chuan zirtirna a pe a ni.

Pu Sangte-a chuan inthlan buaipuitu turte chu sawrkar hna thawk kan nih angin hna thawh pangai nei sa vek kan ni a, heng kan hnate hi kan hawisan vek rem lo chi te an ni ve thova, a theih chin chinah kan hna pangaite hmuitel pah dan kan zawn thiam a tul a, amaherawhchu inthlan kaihhnawiha kan mawhphurhna erawh hi chu inthlan a zawh fel hma chuan pawhchhiat a thiang lo a ni tiin, election duty-a chhuak kan nih chhung chuan ruihtheih thil lakah pawh kan insum a kan fihlim a ngai a ni a ti a, tin hna kan thawh danah pawh tute maw hlauh vanga mahni zahawmna hloh ai chuan dik taka tih ngam hi a tha a, tute maw atanga nghawng duhawm lo thlen thei anga lang a nih pawhin Election Commission-in inkaihhruaina dan a siamte zawma, dik taka kan ti a nih chuan hetiang thil thleng thei lak atang hian ECI hian min hum theihna dan a nei a ni tiin dik tak leh huaisen taka mahni hna hlen chuah ngam hi a himin a tha ber a ni a ti.

Inthlanna buaipui tura training zingah hian Static Surveillance Team te, Flying Squad-te leh Video Surveillance Team te chu an motor hman tur te nen an awmna hmun tur lam panin vawiin tlai hian an chhuak tan nghal tawh dawn a ni.