Kolasib District chhungah NRHM hmalaknain kumin April thla leh September thla chhung khan thingtlang kilkhawr Doctor awmlohna-ahte Health Camp tum engemaw zat neih a niin hei hi khaw mipui ten an chhawr hle tih vawiin khan District Aids Prevention & Control Committee (DAPCC) Meeting, Kolasib-a neihah tarlan a ni.
Vawiina DAPCC Meeting hi an chairman, Pu R. Lalramnghaka, DC in a hmanpui a. Thu sawiin Pu R. Lalramnghaka chuan Mizote hi hriselna leh faina lamah zirtir kanla ngai nasa hle a. Central lamin programme tha tak tak a rawn duan chhuahte zingah hian khawtlang mipui te chet thawh vena tur a duang tel deuh zel a. Mizote hi kan khawtlang nunah vantlang huap thil tamtak a awm thin a vangin a khawtlang anga chet thawhna tur thila inhmeh tak takte a awm a, chuvangin NGO te pawhin tan la sauh sauh ila, sawrkara thawktute nasa lehzualin i tawiawm ang u, a ti a . Mipui tenkanta,kanthatna tura duan a ni tih I hre theuh ang u, a ti a ni.
Dr. Lalhglimpuia, CMO & Member Secretary chuan NRHM hi Kolasib District chhungah tangkai taka hman a ni tih a sawi a. NRHM hi thingtlang khaw miten a bik taka hriselna kawnga hmalakna te an ban phak ve theih nana Central policy a niin nu, nau chunga thi raicheh leh nausen thi te anlo tlem theih nan tea duan a ni a. A policy-ah hian khaw mipuite chet thawh vena tur a tel thin avangin kan tihve tur awm apiang te phur takin I ti zel ang u, a ti a ni.
National Aids Control Programme, Kolasib District in a record danin nikum June thla atanga kumin September thla thleng khan thisen test tawh mi 30712 zingah mi 402 te chu HIV Positive hmuhchhuah a ni a, chuta zing a tam ber chu hmeichhiat mipat atanga inkai an ni. Heti hi a nih avangin Doctor te chuan thil awmzia chik taka an zir chianna atangin tun ai hian Condom hman uar tha an tih thu leh hei hi mi thenkhat hlauhthawn anga Sex sawimawina lam thil a nih loh thu an sawi a ni. Tun hnaiah Kolasib Rengtekawn tlangval pakhat, Mar dek thiam inti mi pakhat in damdawi diklo a chawh avanga Malaria thihpui ta chungchang pawh sawilan a ni a. Hei bakah hian nausen nei nu thenkhat ten nau hnute an pek vat loh avanga a hnua harsatna thlen thu te, nu hnute naute Lai-a lo sawr hram te an awm thin avanga buaina thlen chungchangte pawh sawilan a ni a. Zirtirna uar lehzuala neih nise an ti a ni.
Tun hnai maia neih zawh tak Red Ribbon Football tournament chu Aids awarwness hlawhtling taka kalpui a ni tih meeting ah hian report a ni a, Tournament chhung khan mi 122 in an thisen an test a, chung zinga mi 98 chu kolasib khaw pawn mite an ni.
