Vawiin hian Mizoram hmun dangte rualin Serchhip DC Conference Hall ah Kuthnathawktute Ni hman a ni a, Pu Lal Thanzara, Information and Public Relations Minister chu khuallian niin DC Complex tuala NLUP Line Department ten Exhibition an buatsaih chu a tlawh kual a ni.

Pu Lal Thanzara chuan, Mizoram sawrkar in Kuthnathawktute a ngaihpawimawhna chu NLUP ah a lang chhuak a, Census 2011 a kan hmuh; Mizorama chhungkaw nuai hnih chuang hlek zinga chhungkaw 1,31,666 ten NLUP hi an dawng a ni. Mi retheite hmangaihtu Pathianin NLUP hi mal min sawm a, kawng hrang hrangin Mizoramin kan hlawkpui tak zet a ni, a ti. Kum 2011 a kan buh thar chu Metric Tonnes 47,201 a nih laiin kum 2015 a kan tharchhuah chu Metric Tonnes 60,679 zet a rawn ni chho va, tlangram loneih chu 29.75 per cent in a tlahniam hial a, RKVY leh NLUP Convergence atangin Link Road pawh Km 772 zet laih a ni. Loneitute hnenah Power Tiller leh Mini Power Tiller tam tak pek chhuah ani tawh a, Godown leh Lei engemaw zat siam a ni tawh bawk. Sawrkar Policy hi za ah za a hlawhtling ngai meuh lo tih kan hre veka, Monitoring Team ten uluk taka an zir hnuin NLUP ah hian thingtlang lam bikah chuan 70 percent vel lai a hlawhtlin beiseina a awm mek a ni, a ti. NLUP kaltlanga mipuite hnena inkhairual taka sum a luh tam avangin vantlang sum lakluh, hmanral leh khawlkhawm (Public Income, Expenditure & Saving) thlengin a tha zawngin a kal a, kohhran thawhlawm in hma a sawn a, sumdawnna a punga, Bank thar tam takin Mizoramah an Branch an rawn hawn phah a ni, a ti. Minister hian NLUP chu kalpui zel a nih tur thu leh NLUP in a hrinchhuan NEDP chu NLUP atanga hlawhtlingte mamawh intawm siamna tura duan a nih thu a tarlang a ni.

A hmanna inkhawmah hian Pu R.Vanrengpuia, SDO Sadaar, NLUP Nodal Officer ni bawk chuan Serchhip District NLUP Report a pe a, Serchhip District chhungah hian NLUP dawngtu chhungkaw 9,524 an awm a, an zinga chhungkaw 2110 te hi thawh thumna a mite niin chhungkaw 1248 te hi thawh lina a mite an ni a, a dang zawngte chu zawh fel tawh thawh khatna leh thawh hnihna a mite an ni.

Inkhawmah hian Pu K. Remthanga, retired – Principal, Government Serchhip College chuan Kuthnathawktute Ni 2017 Thupui a tana thlan “Hah tak leh rim taka thawk chungin kan ei zawk a ni” II Thess 3:8 hmangin thusawina hun a hmang a, Pu R. Lalhlimpuia, President AMFU in kuthnathawktute aiawha thusawina hun a hman bakah NLUP dawngtu hlawhtling mi pathumte hnen atangin thusawi tawi ngaihthlak a ni a; zaithiamte zai ngaihthlak a ni bawk. Tin, kalkhawm kuthnathawktuten an duh apiang an zawh theihna hun siam sak a ni bawka, an zawhna leh hriat duhte hi District Officer ten an chhan sak a ni.

Kuthnathawktute Ni hmanna inkhawm hi Bawrhsap Dr. Lalrozama, IAS chuan a kaihruaia, Serchhip District chhungah kuthnathawktu mi taima tam takte zarah NLUP a hlawhtling chho zel nia a hriat thu a sawi a, Kuthnathawktute Ni ngaipawimawh a lokal zawng zawngte chungah lawmthu a sawi a ni. Dr. Lalrozama hian, a bul tan nan kuminah Department te bul tumin Exhibition buatsaih a ni a, nakkum atang chuan Kuthnathawktute Ni Exhibition hi Kuthnathawktute ngeiin an buatsaih a Department lam ten theihtawpa an tawiawm zawk tawh nan ruahmanna siam tum a nih thu a tarlang a ni.

A hmanna inkhawm neih zawh hnu hian DC Office tualah khuallian Pu Lal Thanzara leh Official pawimawhten NLUP Line Department hrang hrang pariat; AH & Vety, Agriculture, Horticulture, Industries, Forest, Fisheries, Soil and Water Conservation leh Sericulture Department ten an hnathawhte an tarlanna leh an hnuaia kuthnathawktute thawhchhuah thenkhat an pholanna Exhibition hi a tlawh kual nghal a. Kalkhawm mipuite pawhin heng Stall te hi an hlutin an bawh nasa hle a ni.

Kuthnathawktute Ni hi Serchhip District chhungah Thenzawl, N. Vanlaiphai leh E. Lungdarah te pawh hman a ni a, Thenzawlah hian Minister Pu Zodintluanga, N. Vanlaiphaiah Lt. Col Z.S Zuala leh E. Lungdarah Pi Vanlalawmpuii Chawngthu ten an hmanpui a ni.