Kut Hna Thawktute Ni 2017 chu vawiin khan CYLA Hall, Lawngtlaiah hman a ni a. AH & Vety Minister Pu C.Ngunlianchunga chu Khuallian a ni.

Pu C. Ngunlianchunga chuan, Mizoram sawrkarin kut hna thawktute tana ni bik a siam chu kut hna thawktute a ngaih pawimawhzia tilangtu a ni, a ti a. Kut hna thawktute tel lovin ram a kal thei lo va; kut hna thawktute’n ram hmasawn nana mawhphurhna pawimawh tak an neih chu hre reng se a duh thu a sawi. Mizorama kut hna thawktute hian hlawhtlinpui thamin hna kan la thawk lo tih sawiin, hah tak leh rim taka thawh loh chuan hlawhtlinna a awm lo va; hlawhtling tur chuan thil hrang hrang tih kual dum aiin thil pakhata insawr bing a pawimawh tih a sawi. Nakin lawkah Lawngtlai District chu ram leh ram insumdawn tawnna hmunpui a la ni thuai dawn a, chu hun atan chuan rim taka hna thawka lo inbuatsaih a tul tiin, sawrkar tiche dawt khawpa tang turin kut hna thawktu kal khawmte a sawm a ni. Khuallian hian line department hrang hrang hnuaia NLUP dawngtute hnenah NLUP tanpuina a sem nghal bawk.

BCM Lawngtlai Area-a Executive Secretary Rev. R.Lalbiakliana chuan Kut Hna Thawktute Ni 2017-a thupui, “Hah tak leh rim taka thawk chungin kan ei zawk a ni” tih hmangin thu a sawi a. Hah tak leh rim taka hna thawh chu Pathianin mihring a siam dan a nih thu sawiin, thawhrimna leh tih tak takna chu hlawhtlinna kailawn pawimawh ber a ni, a ti.

He inkhawm hi Lawngtlai DC Dr A. Muthamma IAS chuan kaihruaiin, kal khawmte lawmna thu a sawi a. LIKBK General Secretary Rev. C.Hrangzuala’n hunserh hmangin, AMFU lam atangin Pu N.Lalzova’n thu tawi a sawi a. NLUP hlawhtlinpuitu mi pathumin an hlawhtlinna chanchin an sawi a. Zaithiam zai te ngaihthlak niin, hnam lam hmuhnawm tak thlir ho a ni bawk a. Lawngtlai District Industries Centre-a Functional Manager Pu C.Dokulha’n lawm thu sawiin hun a khar a ni.

Chawhnu lamah Lawngtlai khawpui leh a chhehvel khuaa NLUP 3rd & 4th Phase tanpuina dawng tura thlante hnenah NLUP tanpuina sem zui a ni a. Horticulture Department atangin chhungkaw 54, Industries Department atangin chhungkaw 26 leh AH & Vety Department atangin chhungkaw 4 te hnenah tanpuina sem a ni.

He hunah hian department hrang hranga officer te, NLUP line department staff te, Lawngtlai leh a chhehvel khuaa NLUP tanpuina dawngtu te, Village Council te, tlawmngai pawl hrang hrang leh kohhran hrang hrang ai awh te an tel a ni.