Vawiin khan Chhim Veng YMA Hall, Mamit ah Kuthnathawktute Ni, Pi Lalbiaksangi, MCS Mamit District Bawrhsap kaihhruaina in hman a ni a, Food Civil Supplies & Consumer Affairs etc. Minister, Pu John Rotluangliana, bialtu MLA ni bawk chuan Khuallian niin a hmanpui.

Khuallian Pu John Rotluangliana chuan Mizoram mipui zawng zawng thleng phak a ruahmanna (NLUP) sawrkar in a duang chhuak leh tun dinhmunah a dawngtute atanga hlawhtlinna an hmuh chhoh zel avanga lawmawm a tih thu a sawi. NLUP chu tawp mai tur a ni lo tih sawiin NLUP tih chakna turin NEDP ruahman mek a nih thu a sawi a, he NEDP hian NLUP hmanga hmalak tawhnate tha zawk leh changtlung zawkin a thuam dawn tih a sawi a, Agriculture Link Road, Godown leh thil dang dang a tul anga hmalakna turin sawrkar chuan Vaibelchhe 250 a lo dah tawh tih a sawi. NLUP chu hnathawk tura inzirtirna a ni tih sawiin, "Hnathawh zak reng reng tumah an ding chhuak ngai lo" a ti. Sum leh pai, hausakna hi a thawh a thawh chhuah tur a nih hria a, tun aia taima zawk a hna thawk turin kalkhawmte a chah a, sawrkar hna leh hna dang hian min daih dawn loh avangin kut hnathawh uar deuh deuh turin a chah. Eng hna pawh thawk ila, tumruhna leh taimakna nena kan thawh chuan hlawhtlinna kan hmu ngei dawn a ni a ti bawk.

Kuthnathawktute Ni hi Kawrthah ah pawh Minister Pu Lalrinmawia Ralte chuan a hmanpui a, Mizoram sawrkar flagship programme NLUP chu mi harsa zawkte tana eizawnna ngialnghet an neih theihnana tanpuina a nih angin mi tam takte tanpui an ni tawh a,mi harsa leh chhumchia zawkte ngaihsak lo ram hi an dingchhuak ngai lo a ni a ti. Kan nun, kan khawsak leh kan hmakhua ngaia sawrkar in min tanpuina hi hmang khawlo mai mai lo a, a nihna tur ang taka hmang turin kuthnathawktu kalkhawmte chah in Agriculture Department hnuaia NLUP tanpuina a sem nghal bawk.

Kuthnathawktute Ni hi W. Phaileng ah pawh bialtu MLA Pu Lalrobiaka chuan khuallian niin a hmanpui a, hei bakah hian Rajiv Nagar-ah Pu H. Lianzela Addl. DC Mamit chuan khuallian niin a hmanpui bawk a ni.

Mamit khawpui chhunga Kuthnathawktute Ni hmanna Chhim Veng YMA Hall a neih ah hian NLUP beneficiaries ti tha pathum Pu Lalhmangaiha Darlak, Pu Kaphnuna Zamuang leh Pu Zorampara Nalzawl te hnen atangin an hlawhtlinna chanchin ngaihtlak a ni a, Khuallian hian Agriculture Department hnuaia NLUP beneficiary te hnenah tanpuina a sem nghal bawk a ni.

NLUP Line department pariat officialte atangin NLUP hnuaia an hmalakna leh an kalpui dan tlangpui report ngaihtlak niin Pu H. Lalthuama, President AMFU Sub-Headquarters Mamit hnen atangin thusawi ngaihthlak a ni bawk.