Vawiin chawhma dar 11:00 khan Serchhip DC Meeting Room ah MP inthlan leh Hrangturzo Assembly Constituency bye-election a vote tla te chhiar anih huna lo endik tura ruat Micro-Observer te tan Training buatsaih a ni a, Serchhip District-a MP Election General Observer atana ruat Saleem Mohammad IAS, leh Hrangturzo Assembly Constituency bye-election atana General Observer Dr. Gopal Ram Swamy, RCS bakah Pu Lalhmansanga, MCS, Election Officer ten he hun hi an hmanpui a ni.

Training kaihruaitu Pu Lalhmansanga, MCS, Election Officer chuan Micro-Observer atana ruat te chu an hna kalphung sawifiahin Vote chhiar hun laia thil diklo leh felhlel deuh ni a an hriat apiang chu a rang thei ang berin General Observer te hnena thlen zung zung turin a chah a, EVM strong room venhimna uluk anih thu sawiin tun hma ang thovin sipai chi hrang hrangin thuah thumin an ven bakah Strong Room tlawhtute pawh log book siamin uluk takin an tlawh ni leh darkar chhinchhiah vek anih thu te, CCTV footage felfai taka vawnhim vek anih thu te a sawi a ni.

Serchhip District chhunga MP inthlan leh Hrangturzo Assembly Constituency bye-election a vote tla te chhiar na tur atan hian Counting Hall pahnih ruahman a ni a, Counting Hall No. 1 atan DC Conference Hall hman ani ang a, hetah hian Hrangturzo bye-election a vote tla leh Hrangturzo Constituency a MP Election a vote tla chhiar a ni ang. Counting Hall No. 2 atan DC Office-a Establishment Room hman ani ang a, hetah hian Serchhip leh Tuikum Constituency a MP Election vote tla te chhiar ani thung ang.

Vote chhiar huna Micro-Observer ho thutna tur Constituency hi vawiin tlaia second randomization neih hunah siam fel a ni ang a, Counting Table an vil tur chu naktuk zingah ruahman ani ang.

ECI thuchhuak angin naktuk zing dar 8:00 atang vote tla te hi chhiar tur a ni ang a, Hrangturzo Constituency bikah chuan Returing Officer, Serchhip Bawrhsap ni bawk hovin bye-election a postal ballot tla te chhiar hmasak phawt ani ang a; postal ballot chhiar tan anih atanga minute 30 a ral hnu ah EVM a vote tla te chhiar tan ani ang.

Master Trainers Pi B.Malsawmtluangi, MCS, SDC leh Pu Vanlalrova, MCS, BDO, Serchhip ten Micro-Observer te hi Training an pe a ni.