Vawiin chawhma dar 11:00 khan Serchhip-a PCR High School-ah Mizoram State Anti-Tobacco Day hmasa ber chu Addl. DC Pu VL. Remliana kaihhruainain hman a ni a, District Medical Superintendent Dr. ZD. Lalmuanawma’n sikul naupangte leh kalkhawm te hnenah vaihlo leh a kaihhnawihin mihring leh kan khawtlang tana harsatna a thlen hrang hrangte sawiin zirtirna a pe a ni.

He hunah hian inkhawm kaihruaitu Pu Rema chuan Mizoram chu Kristian ram ni siin, India ramah zahthlak takin vaihlo leh a kaihhnawih ti nasa ber kan ni reng mai a, hei vang hian Mizoram sawrkar chuan May 31-a World No Tobacco Day hman mai duh tawk tawh lovin, vaihlo leh a kaihhnawih ti thin ten an sim theihna tur leh, a la ti ve ngailo ten an tih ve hauh loh nana hma laa beihpui thlak tul a ti a, chuvangin he ni; September 11 hi Mizoram Sate Anti-Tobacco Day atana ruat a, kum tina hman chhunzawm zel turin ruahmanna a lo siam ta a ni tih a sawi a, kalkhawmte chu hetiang thila invawng turin a chah nghal bawk a ni.

Thusawitu Dr. Muantea pawhin Mizoram chu mihring kum 15 tling chin, vaihlo leh a kaihhnawih ti nasa ber kan nih thu leh hetiang tihin mihring hriselna a khawih pawi theih dan hrang hrang te a sawi a, India ram pum puiah vaihlo lam ti thin 41% vel a nih laiin Mizoramah chuan 67.2% lai a ni a, kan Pathian thu nen pawh a inhmeh lo em em a ni a ti. Dr. Muantea chuan vaihlo zial khu hian thil chi hrang hrang 7000 chuang a pai a, chung zinga 100 bawr vel chuan kan taksa tan natna a thlen thei a, chung chemical zingah chuan 60-90 velin cancer thlen thei an pai a ni tiin Mizote cancer-a kan sang ber leh zuk leh hmuam tia kan sang ber hi thil inzawm tlat a nih a rin thu a sawi bawk.

Pu Muantea chuan Hrawk leh ka chhung bawr vel cancer tam ber chu zuk leh hmuam ti thin an ni a, chuap cancer zinga 90% pawh zial zu thin an nih tih hriat a ni tiin hetiang tih hian natna dam thei lo min siam nasa a ni a ti a. Zial zu mite tan stroke leh asthma te, lung lam thalo leh BP sang te neih a awlsam bik a, hmeichhiate tan phei chuan naupai a tipiangsualin an than a tithu thei a, nau chhiat pawh a ti tam bik a ni tih sawiin, kalkhawmte chu hetiang laka fihlim tum hram turin a chah bawk a ni.

Dr. Laldawngliana Sailo, District Chief Medical Officer chuan lawmthu sawiin hetiang programme vêk hi Serchhip khawchhunga zirna in hrang hrang, Marian High School te, JM High School bakah Serchhip Government Higher Secondary School-ah te neih a nih thu a sawi bawk. He programme hman zawh a nih hnu hian Serchhip District Anti-Tobacco Squad member-te chuan khawchhung hmun pawimawh laiah te COTPA dan bawhchhia an awm leh awm loh vaiin Special Drive an neih chhunzawm nghal a ni.