Vawiin khan Lawngtlai DC Conference Hall ah Mizoram State Anti-Tobacco Day hmanna inkhawm buatsaih a ni a, District Bawrhsap Pu J. Hmingthanmawia chuan khuallian niin he hun hi a hmanpui.

Thu sawiin Pu J. Hmingthanmawia chuan Mizo te hi zuk leh hmuamah kan fihlim lo hle a, hei hi thil zahthlak ah pawh kan ngai lutuk lo niin a lang. Amaherawhchu Mizo te hian zuk leh hmuam hi a ti tu chauh ni lovin a bul hnaia awm te tan pawh thil thalo a thlen thei a ni tih kan hriatchiana zahna chang kan hriat a hun tawh a ni, a ti a. World Health Organisation Report tarlangin Bawrhsap chuan kumtin khawvel pumah zuk leh hmuam vanga thi maktaduai 6 an awm bakah chung zuk leh hmuam ti te vanga lo tuar ve an bulhnai a mi (Second-hand Smoker)  mihring nuai 6 an thi ziah a ni a ti. India ram State zirchian naah Mizoram chu zuk leh hmuam ah kan sang filawr a, Hrawk bawk, Chawdawt leh Pumpui Cancer ah kan sang fal hle bawk. Mipui chen tam dan a zir a vaihlo leh a kaihhnawih ti nasa chhut naah khawvelah kan sang ber a, mipui 67.2%  ten zuk leh hmuam kan ti mek ni a report a ni, a ti bawk.

Hei vang hian India sawrkar chuan October 2, 2008 atang khan puipunna hmun a mei zuk a khap a, hei hi mi tam takin an tangkai pui hle a ni tih hmuhchhuah a ni. Mizoram sawrkar pawhin hei mai hi duhtawk lovin State Level Co-Ordination Committee on Anti-Tobacco din in District tinah District Level Committee a din bawk  a, an ni hmalakna hian zuk leh hmuam a kan fihlimna tur hmalakna hrang hrang an kalpui mek a ni. Hetiang hmalaknaah hian Lawngtlai District pawh kan thawh that avangin vawiin Anti-Tobacco Day 2014 ah hian meizial leh a kaihhnawih tih tlem kawnga hmasawn ber lawmman (Most improved District on reduction of active smoking and Smoking aids)  kan dawng hial a ni a ti a, Lawngtlai District mipuite chu zuk leh hmuam nghei theuh turin a ngen a ni.

Vawiin a inkhawm hi Pu T. Thangthuama Principal Lawngtlai, College in a kaihruai a Dr. Zothanpari Chhakchhuak in Vaihloin Hriselna a Nghawng Dan zirtirna chipchiar taka a pek bakah Pu K. Zozamliana, SI kaihhruaina hnuaiah India Mite Nunna Chhan Nana Thutiam kalkhawm ten an nei bawk.

He hunah hian Lawngtlai khawpui chhunga veng hrang hrang VC, LWA, YLA leh chanchinbu mite an tel a ni.