Nimin tlai khan Serchhip District Legal Metrology Enforcement staff te chuan Serchhip khaw chhunga naupang lawm (Toys) zawrhna dawr paruk (6) Maximum Retailed Price aia sanga bungraw zuarte chu an man a, office ah kovin dan bawhchhiaa bungrua an zawrh chhan an insawifiah tir.

Legal Metrology ten MRP aia tova thil zuar dawr te leh MPR dik tak thai chhiaa a chunga lehkha them danga MRP dang bel chawp zuarte chu manin, an thil zawrhna rate chu titawp nghal tura an hrilh a chutianga bungrua an zawrh chhan an insawifiah tir bawk. Heng dawrte hian an lakna dawr ten MRP bel chawp an rawn pek ang chu an lo lak ve mai thin thu an sawi avangin Legal Metrology te chuan an bungraw lakna (supply tu) te biak pawh an tum a. Mahse heng Bungraw Supply tu dawrte hian an Cash Memo ah an Contact Number an lo dah loh deuh vek avangin biak pawh mai theih an ni rih lo a ni. Memo pakhat, contact Number inziahna erawh chu Silchar lam dawr niin Legal Metrology te hian an be pawp nghal a. Hetianga ti tawh lo tur leh an ti lui a nih chuan Taxation Department lamah an bungrua block sak tura an ngen tur thu an hrilh a ni. Tin, nimina dawr an man te leh mipui hnena bungrua hralh chhawnga dawr siam zawng zawngte chu an bungraw lakna Cash Memo, a dawr neitu te Contact Number awmna ngei chauh la tawh turin an ngen nghal bawk.

Bungrua reng reng a Maximum Retailed Price aia to va zawrh hi Package of Commodity Act chuan a khap a, chutianga ti lui man te chu PC Rules Section 2 & 5 hmangin Rs 2000 thlenga chawi tir theih niin vawi khat aia tam man phei chuan chu aia tam pawh chawi tir theih niin Pu Lalsangzuala, Inspector, Legal Metrology, Serchhip chuan a sawi.

Vawiin vek hian Serchhipa sem tur eirawngbawlna Gas lo thleng chu Legal Metrology Department Staff te hian a buk tlin leh tlin loh an enfiah nghal bawk a.