Nimin chawhnu dar 1 khan Champhai DC Conference Hall, Keifangtlangah Champhai District chhunga Teachers' Day hman dan tur ngaihtuahin District Level Committee an thu khawm a. Chairman, District Bawrhsap Pu Vanlalngaihsaka'n meeting hi a kaihruai a, Committee member-te an tel tha hle.

Meeting kaihruaitu District Bawrhsap chuan zirtirtute hlut zia leh pawimawh zia inzirtir uar a tul thu sawiin, naupangten zirtirtute an zahna tur leh chawimawina theihna tura Teachers' Day lawmna programme duang turin member-te a sawm a.

Teachers' Day lawm dan tur ngaihtuaha thukhawm, Champhai District Level Committee, chuan kumin Teachers' Day chu 'State Level Working Committee for Celebration of Teachers' Day 2016' kaihhruaina siam zulzuiin District khawpui, Sub-division-te leh block hrang hrang bakah khaw hrang hrangah programme siam ni se a ti a. District khawpuiah chuan Teachers' Day pualin zirtirtute chawimawina kawngzawh buatsaih a ni dawn a. Zirlai naupangte tan bik, "Zirtirtute i chawimawi ang u" tih thupuia hmangin Essay inziahsiak buatsaih a ni bawk ang. Tin, zirtirtute pualin Talk show buatsaih tum a ni bawk.