Vawiin tlai dar 3:00 khan Lunglei Circuit House Conference Hall-ah Lunglei District Level Swachh Bharat Mission (Urban) Committee an thukhawm a. Lunglei DC leh Committee Chairman ni bawk Pu Abhijit Vijay Chaudhari, IAS-in a kaihruai a ni.

Committee member-te thutkhawm vawikhatna ah hian Lunglei District Urban Development Officer leh Member-Secretary ni bawk Pu Andrew Lalhruaia chuan powerpoint presentation hmangin Swachh Bharat Mission (Urban)-in a thil tum te leh Lunglei Town huamchhunga hma an lak tawhna te a tarlang a. YMA Lunglei Sub-Headquarters te nena thawk ho in mimal inthiarna thianghlim – Individual Household Latrine (IHHL) 50 sak a nih mek thu leh vantlang inthiarna ekin 20 sa tura ruahmanna siam mek a nih thu a tarlang a ni.

Meeting-ah hian Lunglei Town Open Defecation Free (ODF)-a puang thei tura hmalak dan tur te an sawiho a. Individual Household Latrine za (100) dang sa leh turin State Level-ah dilna thlen nise an ti a. Vantlang inthiarna sak zawh te chu tlo taka enkawl a nih theih dan tur te an sawiho a ni. Heng bakah hian awareness siam, a bik takin school-ah te neih a pawimawh zia an sawi bawk.

Lunglei District-ah hian Census Town pathum awm in, Hnahthial leh Tlabung Town Area-ah te pawh Swachh Bharat Mission (Urban) hna kalpui tan thuai beisei a ni.