Vawiin chawhma khan Serchhip Hmar Veng YMA Hall-ah “National Drinking Water & Sanitation Awareness Week, 2015” hawnna inkhawm buatsaih a ni a, Pu RL Chhuanawma, President, Sub-Headquarters YMA, Serchhip chu khuallian a ni a, Serchhip Town Area a YMA Branch hrang hrang aiawh bakah MHIP, MUP leh MJA aiawh te, Sawrkar Department sawm bik aiawhte an tel kim hle a ni.

Serchhip-a “National Drinking Water & Sanitation Awareness Week, 2015” hawngtu khuallian Pu RL Chhuanawma chuan vawiina tuihna kan humhalh that hian kan tu leh fate bakah kan thlah lo kal zel tur te tan ram nuam tak kan siam sak a ni tih thu hi YMA Branch hrang hrang aiawhten an awmna hmuna an kir leh hunah lo pu darh theuh se a duh thu a sawi a, Tuihna humhalh leh fai inzirtir kawnga Sawrkar hmalakna zawng zawngte chu mipuiten kan thlawp a Sawrkar tha tichaktu a kan tan theuh a ngai a ni a ti bawk.

Thusawitu dang Pi Juhi Mukherjee, IAS, Serchhip District Water & Sanitation Committee Chairman ni bawk pawhin tui thianghlim pawimawhzia sawiin khawvel hmun thum a thena hmun hnih hi Tui a ni a, chutah tui thianghlim kan tih hi chu heng zinga uihum tiat lek a ni a, tui thianghlim hi hriselna atana kan mamawh pawimawh ber pakhat anih bawk si avangin humhalh kawngah tan kan lak nasat a ngai a ni a ti a, mimal tinin mahni inchhungkhurah tui thianghlim kan tlan theih mawhphurhna kan nei theuh a, a bik takin MHIP ten hetih kawngah hian hma an hruai a tul lehzual a ni a ti bawk.

Vawiin “National Drinking Water & Sanitation Awareness Week, 2015” hawnna inkhawm hi Er. Lalhruaia, EE, PHED Serchhip Watsan Division in a kaihruai a, Serchhip Division hnuaia Sub-division zawng zawngah leh J.E. thuthmunah te pawh he hun hi hman niin East Lungdar Sub-division ah erawh naktuk hian hman a ni thung ang. Vawiin hun hmanna ah hian PHED in tui tithianghlim tura an sawngbawl dan leh an enkawl dan sawifiahna hun hman tel niin tui tihthianghlimna khawl chi hrang hrang te mipui hmuh turin an pholang a, tlawmngai pawl hrang hrang MUP, MHIP leh MJA aiawh ten “Tuihna humhalh leh Faina chungchanga mitin mawhphurhna” tih thupuia hmangin titi hona (panel discussion) an nei bawk a ni.

“National Drinking Water & Sanitation Awareness Week, 2015” hi March ni 16, 2015 atanga March ni 23, 2015 thleng hman tur a ni a, hemi pual hian Serchhip Town Area a YMA Branch zawng zawng huapin Faina kawnga hma la tha inelna buatsaih a ni a, March ni 23, 2015-a Week kharna inkhawmah lawmman sem a ni ang.