Vawiin chawhnu ah khan I&PR Conference Hall ah Mizoram Youth Commission (MYC) in Vocational Training nei tura thalai 58 a thlanchhuah te thlahna hun buatsaih a ni.

Training a chhuak tur te puala hun buatsaih hman zawh a ni hnu hian Pu R.L. Pianmawia, MLA, Deputy Chief Whip leh MYC Chairman Pu T. Sangkunga, MLA te’n training turte hi I&PR Office kawtah an vai liam a ni.

Thalai hna training tur te fuihna hun hmangtu, Pu R.L. Pianmawia, MLA hian harsatna a lo paltlang tawh dan leh hlawhtlinna a tawn chhoh dan chanchin sawiin training tura thlanchhuah te chu harsatna emaw retheihna avanga hlawhtlin an tumna bansan hauh lo turin a fuih a. Nu leh pa hmuh lohva khawsa tur an ni tih hriain an nun uluk tur leh Mizo hnam hmelhmang ti bal lo turin a chah a ni. Thusawitu dang MYC Chairman Pu T. Sangkunga chuan Mizoram in thalaite tan MYC a din hnuah thalai tam takin hlawhtlinna an hmu tawh a. Heng thlalai hlawhtling zinga mi thenkhat phei chuan an thalai pui te tan ngei pawh hna an zawn sak hial tawh a ni a ti. Mizoram sawrkar hian training tura a tirh te himna a ngai pawimawh a, an chanchin a chhuizui zel bakah harsatna tawk an lo awm pawh in an tan sawrkar a penchhuak zel dawn a ni tiin training tura tirh chhuah te hi thlamuan a. Nun uluk tur leh an thil zir chiah ngaihtuah turin a chah a ni.

Vocational trainees te puala programme buatsaih hi Dr. J.T. Vanlalngheta, Secretary, MYC in a kaihruai a. Tun tuma an tirh chhuah 29 te hian PCTI, Pitampura, New Delhi ah thla 4 chhung an zir anga, a dang 29 erawh hi chuan SBJ, Noida ah thlaruk chhung an training thung ang. Training tur te senso hi heng training institutes, Vocational Training Providers (VTP) an tih bawk te hian a tum sak vek dawn a. VTP te senso hi Ministry of Labour & Employment in a rul dawn a ni. MYC hian thalai 1173 tir tawh in heng zingah hian la training mek tam tak an awm mek a, training zo tawh mi 497 in hna an thawk tawh tih MYC hotute hian an tarlang a ni.