Mizoram Sorkar hmalaknain Champhai District-ah hlawk leh tha zawka (large scale)-a kiwi leh grep chin theih dan tur enfiahin Taiwan mithiamte Mizorama lo kalte chuan vawiin khan Khuangphah leh Hnahlan a loneituten kiwi leh grape an chindan te an enfiah.
Pu Hsin-Chiang Hsu, Assistant Representative, Taipei Economic and Cultural Centre, Pu Yih-Shiow Chang, Senior Adviser and Project Manager, Taiwan ICDF leh Pu Ming-Te Lu, Assistant Researcher, Crop Science Division, Taiwan Agriculture Research Institute-ten vawiin khan Khuangphah leh Hnahlana huan-te an enfiah.
Taiwan atang hian Taiwan Economic and Cultural Centre bultumin Dr. Hsu Hsin-Chiang, Assistant Representative, Taipei Economic and Cultural Centre, Pu Yih-Shiow Chang, Senior Adviser and Project Manager, Taiwan ICDF leh Dr. Ming-Te Lu, Assistant Researcher, Crop Science Division, Taiwan Agriculture Research Institute-te lokalin vawiin chawhma lam khan Khuangphaha kiwi chinna hmun an tlawh a. Lei hanna an enfiah bakah kiwi an sawngbawl dan te a hmunah an en bawk a ni.
Hemi hnu hian Khuangphah DC Rest House-ah Taiwan palaite hian loneitute hi kawmin kiwi chin kawnga an harsartna tawh mekte an sawipui a. Loneitute chuan kiwi chu a par hnuah pawh a rah hmuh tur a awm loh chang te, a ler emaw a bul atangin an thlai thenkhat chu a thih thu te hrilhin Taiwan mithiamte chuan lei tha pek dan uluk a tul thu te leh kiwi chi (variety) bakah sik leh sa chuan a thar chhuahah awmzia a neih theih thu te an sawi a ni.
Taiwan mithiamte hian vawiin chawhnu khan Hnahlana grape chinna leh winery te an tlawh bawk a. Hnahlan Grape Growers Society te nen inkhawmhona neiin hlawk zawka grape chin dan te, a rah thlum zawka thar theih dan te leh a chinna kawnga harsatna awm theite an sawiho a ni.
Mizoram Chief Minister Pu Lal Thanhawla leh MP Rajya Sabha Pu Ronald Sapa Tlau ten hralh chhuah theih tur theirah kan thar chhuah dan kawng dap tura an hmalakna leh ngen angin Taiwan mithiamte hian an rawn enfiah a ni. Taiwan mithiamte hi DRDA leh Horticulture Department bakah Media miten an tawiawm a ni.
