National Voters’ Day Vawi hnihna chu India ram puma hman anih rualin vawiin chhun dar 11 khan Serchhip D.C. Conference Hall-ah District Bawrhsap, District Election Officer ni bawk Pu P.Lalchhuanga MCS hovin hman a ni a, Electoral Roll a telh thar mi engemawzat hnenah Electoral Photo Indentity Card (EPIC) hlan an ni nghal bawk.

District Bawrhsap chuan Electoral Roll a thun luh thar te chu a lawmpui thu sawiin, Electoral Roll-a thun an nih rualin India khua leh tui te tana Dikna, chanvo leh hamthatna hrang hrang ruahmante chu an chanpual a ni ve ta tih a hrilh a, EPIC an dawn tur chu India rama Identity Card rintlak ber anih thu sawiin mipuite rorelna (Democratic process) a an tih tur, inthlan huna phur taka vote thlak chu hlenchhuak thin ngei turin a chah bawk a ni.

Bawrhsap chuan sipai sawrkar leh dictator te lal hrawtna hmun, mipui zalenna rahbehna hmuna kan awmlo chu kan vanneih thu sawiin India Dan Pui (Constitution) in khua leh tui te chanvo hrang hrang a pek zingah inthliar hranna awm miah lova kum 18 chin chung lam tupawhin kan aiawhtu tur thlan theihna min pek hi a hlut zia hria a, EPIC dawng thar thalai rualte chu nakin lawka ram hruaitu tur te an la ni tih inhre chunga, mipuite sawrkar (Democracy) tichak tura theihtawp chhuaha pen chhuak turin a sawm nghal bawk a ni.

Serchhip District ah hian MLA Constituency pathum – Serchhip, Tuikum leh Hrangturzo te awmin Electoral Roll revision hnuhnung ber neih anih hnu ah tunah hian voters 43,322 an awm mek a ni.

Vawiin National Voters’ day hman na inkhawm hi Pi K.Vanlalruati MCS, Election Officer-in a kaihruai a, Pu Malsawmtluanga MCS, AERO Tuikum Constituency pawhin thusawiin, Chief Election Commissioner thuchah a huhova chhiarchhuah a ni a, Pu Lalsangliana MCS, Additional D.C. in Serchhip MLA Constituency chhunga Electoral Roll a tel thar te hnenah EPIC a hlan a, Constituency dang a Electoral Roll a tel tharte EPIC chu anmahni bialtu Booth Level Officer (BLO) te hnenah an semchhuah tura hlan an ni.