Vawiin hian Serchhip DC Conference Hall ah Union Minister of Agriculture, Shri. Radha Mohan Singh thupek angin Krishi Vigyan Kendra (KVK) Serchhip District ten New India Manthan; Sankalp Se siddhi tia sawi bawk programme an buatsaih a, Pi Vanlalawmpuii Chawngthu, MLA chu khuallian a ni.

Khuallian chuan, India ram thar siam turin kan zavaia tanrualna hi a pawimawh ber ani a ti a, hlawh hmuhna satliah mai nilova tih tak taka hnathawh hi a tul a ni a ti bawk. Kut hnathawktu nih hi a zahthlak loh ani tih hi kan hriat thar a tul hle a, sawrkar lama kan hotute kutah innghat mai lova, kan tihtheih ang apiang kan tih ve hi hma kan sawn tlanna tur a ni, a ti bawk. Kan hotute zarah kut hnatkawtuten hmanraw tha leh changkang kan hmang ve ta mek zelte hi a lawmawm hle a, tanpuina engpawh kan dawn apiang chu a nihna tur taka hmangtu ni zel ila, sawrkar department lama thawktute leh mipuite kan tan tlan phawt chuan India ram thar hi kan siam thei ngei ang a ti bawk.

He hun kaihhruaitu, Pi Sangchhin Chinzah,  chuan, India sawrkar in kum 2022 a kan buh leh bal tharte a let hnih a tihpun a tumna chu New India Movement hnuaia hmachhawp pawimawh tak a ni a. Chumi tihlawhtling tur chuan kuthnathawktute, kuthnathawktute ngaihventu sawrkar Department zawng zawng leh mitinin theihtawp kan chhuah tlan a ngai dawn a ni, a ti a. Vawiina kalkhawm loneitu leh sawrkar mipawimawhte chungah lawmthu sawiin, a kaihhruaina hnuaiah New India Movement thutiam neihna hun hman a ni a. Loneitute pawimawhna leh an hmasawnna tur thil pawimawh tihlanna video; Kisan Film en ho na an nei bawk.

He mi hnu hian Department hrang hrang, Agriculture, Horticulture, AH & Vety, Soil, Fisheries leh Sericulture a District Officer ten kum 2022 a tharchhuah a leta a pun theihna tura an Department hmalakna hrang hrangte, khawl thar leh changkang zawk ruahmanna an neih te sawifiahna hun an hmang a. Pu MD Singh, Branch Manager, SBI Serchhip chuan thlai Insurance chungchang sawina hun a hman bakah KVK Serchhip District mithiam ten loneitute fuih tharna hun hmangin District chhunga loneitu thlan chhuah mi pathum hnenah thilpek an hlan  bawk a ni.

Dr. Animesh Deka, i/c Senior Scientist & Head, KVK Serchhip District chuan he hun an hman chhan leh a thil tum sawifiahna neiin an loneitute tan engtiklai pawha dawr theih leh rawn theiha an awm thu a tarlang a. He hun hi Pu Vanlalhmuaka Ngente, Scientist, KV, Serchhip District chuan lawmthu sawiin a khar a ni.