Nihnih awh Ngawr (TB) natna veitute enkawl dan tur inzirtirna chu Christian Medical Association of India leh YMA Sub-Headquarters, Serchhip  tangkawp buatsaihin Chief Medical Officer’s Conference Hall, Serchhip-ah nimin leh vawiin nileng khan neih a ni a, YMA Sub-Headquarters, Serchhip huam chhunga YMA Branch hrang hrang aiawh mi thahnem tak an tel a ni.

Nimin September ni 1, 2011 khan “Capacity Building of CBO’s, Serchhip” ti a vuah training hi Lalrempuii Fanai, District Coordinator , Christian Medical Association of India chuan kaihruaiin, Dr Lalhlunpuii, District TB Officer -in TB chung chang, a lanchhuah dan, a enkawl dan te leh MDR-TB, HIV-TB chung chang te a sawi a, Dr. T. Lalhlimpuii, District Programme Manager, NRHM chuan midangte nena thawhhona tha neih theih dan tur (communication skills) kawng kawhhmuhin zirtirna a pe bawk a ni.

Vawiin nilengin Training hi neih chhunzawm niin chawhma lamah Pu H. Laltanpuia, Senior Treatment Supervisor, District TB Centre, Serchhip in Directly Observed Treatment, Short Course ( DOTs) leh a ei dan kimchang a sawi a, chawhnu lamah Lalrempuii Fanai, District Coordinator, CMAI-in TB natna leh a kaihhnawih thila mipuite zirtir chhawn leh dan tur te, natna enkawl dan tur chung changa Trainee te mawhphurhna leh hriat tur hrang hrang te a sawipui bawk a ni.

Kum 2010 khan Serchhip District chhung ah TB damlo mi 52 enkawl  an ni a, TB vanga nunna chan  mi 4 an awm bawk . Kumin kum tan tir atanga August ni 31 thleng khan Serchhip District chhung ah  TB vei enkawl lai mi 45 an awm  a ni.

Christian Medical Association of India(CMAI) hi kum 1905 ah Indian rama Christian Missionary ten a huhova Pathian rawng an bawl theih nan leh miin thlarau leh taksa a damna an lo chan theih nan Medical Missionary Association tih hming pu in an din a. Kum 1926 ah a hming hi Christian Medical Association of India(CMAI) tiin thlak a ni ta a ni.

CMAI hian HIV/AIDS, Malaria, Women issue, Disaster Response, Substance Abuse leh TB lamah India ram pumah hma a la mek a, TB Project bik hi ‘Project Axshya’ tiin a hming hi vuah a ni a. He project bik atan hian Serchhip District chhungah YMA Sub-Headquarters, Serchhip, Serchhip Area Baptist Council, Ramlai Presbytery leh Chhimchhak Presbytery te nen MOU sign tum mek a ni a.Mipui te TB natna chungchang zirtirna ngunthluk taka pek thin a ni. Lunglei District ah pawh Lunglei South Area Baptist Council ( ABC), Lunglei North ABC, Hnahthial ABC leh Buarpui ABC te nen MOU sign tum mek a ni.

Mizoramah he project hi kumin April atang khan tan niin Lunglei, Serchhip, Mamit, Kolasib leh Champhai District ah te he project hi kalpui mek a ni a, nakum ah Aizawl, Lawngtlai leh Saiha District ah pawh hma lak tum a ni.