Chief Minister Pu Lal Thanhawla chuan vawiin khan Kolkata, Rajarhat, New Town ah Mizoram House thar sak tur lungphum a phum.

Chief Minister chuan Kolkata ah Mizoram House neih belh thei tura West Bengal sorkarin a sakna hmun tur ram zau tha tak min pe chu lawmthu a sawi a. Tuna Mizoram House 2 kan neih sa hian kam mamawh min khawp loh avangin a dang neih belh dan kan ngaihtuah thin na ti puitling thei tura a awm ta chu a lawmawm hle a ni a ti a. A hmangtu mi chi hrang hrang, sorkar hnathawkte, khualzinte, zirlai te leh sports lama feh chhuak thinte bakah, abik takin  damlo cancer veite tan a pawimawh hle dawn a ni a ti a. Chief Minister chuan India ram hmun hrang hrangah Mizote  kan awm ve tak zel avangin Pune ah leh Chennai ah te la neih belh tura hmalak mek zel a ni a ti. Kolkata a Mizoram House pathumna kan neih tur hian Mizoram leh West Bengal mipuite inkungkaihna tha zawk a thlen ngei a beisei thu a sawi bawk a ni.

New Mizoram House sakna hmun tur hi kum 2008 October thla khan West Bengal sorkar chuan 701.793 sq meters a zau a pe a. Mizoram PWD chuan New Town Kolkata Development Authority hnen atanga building sak phalna a hmuh hnuah, a building architectural leh strucrural drawings te a buatsaih a. A sakna senso tur cheng vaibelchhe 11.29 pawh Mizoram sorkarin administrative approval kum 2010 December thla khan a pe a ni. A building sak hna hi M/S Gagan Construction (Pvt) Ltd, Kolkata hnenah thawk turin ni 16 June 2011 khan work order pek a ni a, thla 20 chhunga sa zo tura tih a ni.

Mizoram House thar tur hi Mizo pa chhiara chhawng 6-a sanga sak tur a ni a, a building hian 311.29 sq meters a zau a thut dawn a ni. A buildingah hian kangmei chhuak hre thei khawl, automatic fire detection system te, tui tih thianghlimna, electrical sub station, tui pump khawl, lift leh air conditioning system te dah a ni ang. A ground floor hi motor parkna hmun tura ruahman a ni a, chhawng khatna hi office, reception leh dormitory khum 8 awmna a hman a ni ang. A chhawng leh chiah 2nd floor hi choka, dining hall leh room atan ruahman a ni bawk a. A chhawng dang zawngah hian double bedded room 4 zel awmna tur leh dormitory te a awm bawk dawn a ni. A chhawng chung ber, sixth floor hi chu staff quarter atan hman a ni ang.

Mizoram House awmna hmun hi Tata Cancer Damdawiin nen inhnaih taka awm a ni a. Lungphum phumna inkhawm hi a hmunah buatsaih a niin, Pi Renu Sharma, Secretary, GAD, Mizoram in a kaihhruai a. Inkhawmah hian Transport Minister Pu P.C.Zoramsangliana, Pu Lalrinmawia Ralte, Parliamentary Secretary, Pu K.Liantlinga leh Mizoram Sorkar Advocate General Pu Biswajit Deb leh official mi pawimawh dang te an tel a. An ni bakah hian Salt Lake Municipal Corporation Chairperson Pi Krishna Chakravarty in a hmanpui bawk a ni.

Lungphun function neih zawh hian Salt Lake a Mizoram House-ah Mizo bikte tan inkhawm hun buatsaih leh a ni a, kalkhawm zawng zawng ten ruai an kil nghal a ni.