Vawiin chawhnu dar 1.45 khan Mizoram Governor kal chhuak ta Lt. Gen. (Retd) M.M. Lakhera, PVSM, AVSM, VSM chuan Lengpui airport atangin Air India thlawhna AI-713 in Mizoram a chhuahsan a; a rual hian a nupui leh a tute pahnih an tel bawk.

Governor haw tur hi airport-ah Speaker Pu R. Romawia, bakah Finance Minister Pu H. Liansailova te, Tourism Minister Pu S. Hiato te, Pu Vanhela Pachuau, Chief Secretary te, Pu Lalrokhuma Pachuau, DGP te bakah senior officer thahnem takin an thlah liam a ni. Airport-ah hian Mizoram Police-ten amah thlahna parade an buatsaih chu a endik hnuah Governor chuan Mizoram chu ban vaiin a mangtha ta a ni.