Sawrkar Laipuiin thingtlang hmasawnna tur leh mirethei te dawm kanna tur atana ruahmanna a siam chi hrang hrang mipuite hrilhhriatna hun  ni thum awh tur Bharat Nirman Public Information Campaign chu vawiin atang khan New Serchhip YMA Hall-ah neih tan a ni a, Lt. Col. Z.S.Zuala, Parliamentary Secretary chuan khuallian niin he hun hi a hmanpui a, Serchhip District Bawrhsap Pi Juhi Mukherjee, IAS chu Khualzahawm a ni.

Public Information Campaign hawng tu Khuallian chuan Sawrkar Laipuiin mipuite hmasawnna tur rahbi a chhawpchhuahsak chungchang inhrilhhriatna hun remchang siam a ni thin chu thil tha tak ni a a hriat thu leh mipuite pawhin an chanvote hrechiang tura ngaihven chu an tihmakmawh ni a a hriat thu a sawi a, Bharat Nirman Programme kaltlang hmasawnna tura ruahman Project hrang hrangin kan ramah a tha zawngin rah a chhuah a chu rah chu kan seng mek a ni a ti a, a bikin PMGSY hnuaiah phei chuan India ramah pawh a hlawkpui ber pawl kan ni a ti a, MGNREGA pawh VC te kaltlanga thawh anih avangin fimkhur a tul thu leh, sum hman tur te dik tak leh lang tlang taka hmanga hnathawh a tul thu te a sawi a; mipuite pawh tun aia nasa lehzuala heng hmasawnna hnathawh chi hrang hrangte hi ngaihven turin leh, Sawrkar hnathawkte pawhin dik taka an thawh theihnan vil peih a lo dawngsawng thiam thin turin a chah bawk a ni.

Khualzahawm District Bawrhsap pawhin Serchhipa Bharat Nirman Campaign buatsaih ani chu lawmawm a tih thu sawiin Bharat Nirman chu mipuite pual anih ang ngeia mipuite pawhin an chhawr tangkai a beisei thu a sawi a; tunhma chuan hmasawnna hi Economic Development atang chauha tehin, kan sum lakluh tam leh tam loh ah the a ni thin a, tunah erawh chuan hmasawnna tehfung atan Human Development telh a ni tawh a, mihring hriselna, zir thiamna te tel lo chuan hmasawnna tluantling a awm tak tak thei lo a ni a ti a, Sawrkar hnathawkte chu mipuite tana an hnathawh hi mipuiten an hriatpuia an hriatchian a pawimawh ani a ti a, Media te pawh mipuite sukthlek siam sak tu pawimawh tak an ni tih in hria a mipuite tan thahnemngai turin a ngen a, kan kawngpuite va that loh a, kan thalaite an hrisel loh a thiamna chhawr tlak an zirchhuah si loh chuan hma a sawn theih dawn loh a ni a ti a; mipuite chu Bharat Nirman Public Information Campaign chhung ngeia an hamthatna tura Sawrkarin ruahmanna a siam chungchang a an hriat duh leh mamawh apiang dilchhut taka zawt turin a ngen bawk a ni.

Serchhip Bawrhsap in a buatsaih Serchhip District chhunga Sawrkarin hmasawnna hna a thawh chi hrang hrang tarlanna lehkhabu “Serchhip On The Road To Prosperity” tih chu Khuallian hian a tlangzarh nghal bawk a ni.

Bharat Nirman Public Information Campaign hawnna inkhawm zawh hian Bharat Nirman kaihhnawih Department hrang hrang ten hma an lak dan leh an hnathawh an tarlan an phochhuahte chu Khuallian hian a en a, NRHM kaltlanga a thlawna damlo entirna Elite Middle School a buatsaih pawh a tlawh nghal bawk a ni.

Bharat Nirman Public Information Campaign Thawhhnihna (Phase-II) hi August ni 14, 2013 khan Delhi ah bul tan a ni a, thupui atan “Glimpses of the India Story’ tih chu hman niin kalphung pawh thlak danglam a ni a, Public Information Campaign hi a rualin hmun thumah tal neih tur ni tawhin tunah pawh hian Main Venue ah New Serchhip hman a ni a, Satellite Venue atan Khawlailung leh Keitum te hman an ni bawk. Ruahman dan chuan New Serchhip ah hian September ni 11 atanga ni 13 thleng PIC hi neih a ni ang a, hetih rual hian Satellite Venue Khawlailungah September ni 12 ah Campaign neih a ni ang a, September ni 13 ah Keitumah Campaign neih a ni thung ang. Heng hunah te hian NRHM kaltlangin Health Camp neih tel tura ruahman anih bakah Disaster Management Campaign hun atan hman a ni bawk dawn a ni.

Bharat Nirman Public Information Campaign (PIC) hawnna inkhawm hi Pu Biakchungnunga, Programme Executive, AIR in in a kaihruai a, PIC Core Committee Chairman Pu Mangjangam Touthang, IIS chuan PIC buatsaih anih chhan leh buatsaih dan kalphungte sawifiahna hun a hmang a, zaithiam hrang hrang zaiin I&B Ministry hnuaia Song and Drama Division ten hnam lam an entir a, Pu M.C. Lianmawia, Co-Nodal Officer, PIC, Mizoramin lawmthusawiin hun a khar a ni.

Chawhnu lamah mipuite hnena sawrkar hmalakna hrilfiahna hun “Technical Session" hman a ni a, hei hi MJA Serchhip District member ten kaihhruaiin Technical Session hi hun hnih ah then a ni a, hunkhatna hi Pu Kapliana, President, MJA, Serchhip in a kaihruaia he hunah hian National Rural Health Mission (NRHM), Mizoram State AIDS Control Society, Disaster Management & Rehabilitation, Food Security Bill leh Aadhar chungchangte  zir ho niin, Technical Session hunhnihna Pu Lalremruata Ralte, Vice-President, MJA, Serchhip kaihhruaiah hian Mahatma Gandhi National Rural Employment Guarantee Scheme (MGNREGS), Sarva Shiksha Abhiyan (SSA), Mid-day Meal Scheme (MDM), Direct Benefit Transfer Scheme (DBTS) leh Land Acquisition Bill chungchangte zir ho a ni a, mipuiten an hriat duh an zawh te chu concerned department official ten an chhan sak thin a ni.